درد بخشا چین چھینا دل کے ٹکڑے کر دیئے

ہائے کس ظالم پہ میں نے بھی بھروسہ کر لیا

اپنی صورت دیکھنا ہو اپنے دل میں دیکھیے

دل سا دنیا میں کوئی بھی آئنہ ملتا نہیں

مجھ کو کسی یزید کی بیعت نہیں قبول

نیزے یہ رکھو آؤ مرا سر بھی لے چلو

دل دیا وحشت لیا اور خود کو رسوا کر لیا

مختصر سی زندگی میں میں نے کیا کیا کر لیا

بت یہاں ملتے نہیں ہیں یا خدا ملتا نہیں

عزم مستحکم تو ہو دنیا میں کیا ملتا نہیں

تکمیل وفا ہوش میں ممکن ہی نہیں تھا

دیوانہ سمجھ بوجھ کے دیوانہ بنا ہے

کعبے میں تھا سکوں نہ کلیسا میں چین تھا

تجھ سے بچھڑ کے دن یہ گزارے کہاں کہاں

تخریب کے پردے میں ہی تعمیر ہے ساقی

شیشہ کوئی پگھلا ہے تو پیمانہ بنا ہے

ڈھونڈھتا پھرتا ہے مجھ کو کیوں فریب رنگ و بو

میں وہاں ہوں خود جہاں اپنا پتہ ملتا نہیں

لغزش ساقیٔ میخانہ خدا خیر کرے

پھر نہ ٹوٹے کوئی پیمانہ خدا خیر کرے