dard baḳhshā chain chhīnā dil ke TukḌe kar diye

haa.e kis zālim pe maiñ ne bhī bharosa kar liyā

dard baKHsha chain chhina dil ke TukDe kar diye

hae kis zalim pe main ne bhi bharosa kar liya

apnī sūrat dekhnā ho apne dil meñ dekhiye

dil sā duniyā meñ koī bhī aa.ina miltā nahīñ

apni surat dekhna ho apne dil mein dekhiye

dil sa duniya mein koi bhi aaina milta nahin

mujh ko kisī yazīd kī bai.at nahīñ qubūl

neze ye rakkho aao mirā sar bhī le chalo

mujh ko kisi yazid ki baiat nahin qubul

neze ye rakkho aao mera sar bhi le chalo

dil diyā vahshat liyā aur ḳhud ko rusvā kar liyā

muḳhtasar sī zindagī meñ maiñ ne kyā kyā kar liyā

dil diya wahshat liya aur KHud ko ruswa kar liya

muKHtasar si zindagi mein main ne kya kya kar liya

but yahāñ milte nahīñ haiñ yā ḳhudā miltā nahīñ

azm mustahkam to ho duniyā meñ kyā miltā nahīñ

but yahan milte nahin hain ya KHuda milta nahin

azm mustahkam to ho duniya mein kya milta nahin

takmīl-e-vafā hosh meñ mumkin hī nahīñ thā

dīvāna samajh buujh ke dīvāna banā hai

takmil-e-wafa hosh mein mumkin hi nahin tha

diwana samajh bujh ke diwana bana hai

ka.abe meñ thā sakūñ na kalīsā meñ chain thā

tujh se bichhaḌ ke din ye guzāre kahāñ kahāñ

kabe mein tha sakun na kalisa mein chain tha

tujh se bichhaD ke din ye guzare kahan kahan

taḳhrīb ke parde meñ hī ta.amīr hai saaqī

shīsha koī pighlā hai to paimāna banā hai

taKHrib ke parde mein hi tamir hai saqi

shisha koi pighla hai to paimana bana hai

DhūñDhtā phirtā hai mujh ko kyuuñ fareb-e-rañg-o-bū

maiñ vahāñ huuñ ḳhud jahāñ apnā pata miltā nahīñ

DhunDhta phirta hai mujh ko kyun fareb-e-rang-o-bu

main wahan hun KHud jahan apna pata milta nahin

laġhzish-e-sāqī-e-mai-ḳhāna ḳhudā ḳhair kare

phir na TuuTe koī paimāna ḳhudā ḳhair kare

laghzish-e-saqi-e-mai-KHana KHuda KHair kare

phir na TuTe koi paimana KHuda KHair kare