ye us kā khel hai jis khel meñ har baar vo yaaro

musalsal haar ke bhī mujh se āḳhir jiit jaatā hai

ye us ka khel hai jis khel mein har bar wo yaro

musalsal haar ke bhi mujh se aaKHir jit jata hai

zarbeñ de kar palaT ke dekhā to

manfī hāsil thā par vo musbat thā

zarben de kar palaT ke dekha to

manfi hasil tha par wo musbat tha

nikal gayā jo kahānī se maiñ tumhārī kahīñ

kisī ko kuchh na batāoge marte jāoge

nikal gaya jo kahani se main tumhaari kahin

kisi ko kuchh na bataoge marte jaoge

ham to ik til pe hī bas ḳhud ko fanā kar baiThe

aur kitne haiñ jamālāt kahāñ jānte haiñ

hum to ek til pe hi bas KHud ko fana kar baiThe

aur kitne hain jamalat kahan jaante hain

haath chehre pe lagāte hī vo ghabrā sī ga.iiñ

merī chīḳhoñ ke tabassum se milīñ jab bāñheñ

hath chehre pe lagate hi wo ghabra si gain

meri chiKHon ke tabassum se milin jab banhen

sach kā nikhrā libās pahne hue

jhuuT niklā hai vaar karne ko

sach ka nikhra libas pahne hue

jhuT nikla hai war karne ko

likhvā diye haiñ rab ko sabhī zālimoñ ke naam

aa.egī sab kī baarī zarā dekhte raho

likhwa diye hain rab ko sabhi zalimon ke nam

aaegi sab ki bari zara dekhte raho

Dar to nahīñ magar kahīñ pattoñ ke shor se

dil ko gumāñ hai aaj koī hādisa na ho

Dar to nahin magar kahin patton ke shor se

dil ko guman hai aaj koi hadisa na ho

dar-ba-dar maiñ hī nahīñ vaqt bhī in rāhoñ par

zaḳhmī ehsās kī sangat meñ dukhī dikhtā hai

dar-ba-dar main hi nahin waqt bhi in rahon par

zaKHmi ehsas ki sangat mein dukhi dikhta hai

zinda logoñ ko nivāloñ sā chabāne vaale

merī mayyat pe bhī ā.eñge ḳhudā ḳhair kare

zinda logon ko niwalon sa chabane wale

meri mayyat pe bhi aaenge KHuda KHair kare

maañg lete haiñ bharose pe ki vo de degā

ham ḳhatā-kār munājāt kahāñ jānte haiñ

mang lete hain bharose pe ki wo de dega

hum KHata-kar munajat kahan jaante hain

shāyad vo jā chukā hai magar dekh lo kahīñ

chāhat ke imtihān meñ ab tak yahīñ na ho

shayad wo ja chuka hai magar dekh lo kahin

chahat ke imtihan mein ab tak yahin na ho

aap vāqif haiñ mire dost hasīñ lafzoñ se

badle lahjoñ kī karāmāt kahāñ jānte haiñ

aap waqif hain mere dost hasin lafzon se

badle lahjon ki karamat kahan jaante hain

vaqt kī kokh meñ sulagtā sā

merī hastī kā ġham pahelī hai

waqt ki kokh mein sulagta sa

meri hasti ka gham paheli hai

haar ko jiit ke pahlū meñ biThā dete haiñ

aisā karte haiñ chalo haath milā lete haiñ

haar ko jit ke pahlu mein biTha dete hain

aisa karte hain chalo hath mila lete hain

zaat kī narmī zehnī ThanDak shafqat saarī duniyā kī

us ne rakh dī masjid dil meñ jag kī saarī maaoñ meñ

zat ki narmi zehni ThanDak shafqat sari duniya ki

us ne rakh di masjid dil mein jag ki sari maon mein