تیری نسبت ملی مجھے جب سے

میں کوئی آرزو نہیں کرتا

ابھی تو اس کا کوئی تذکرہ ہوا بھی نہیں

ابھی سے بزم میں خوشبو کا رقص جاری ہے

یادوں کے نشیمن کو جلایا تو نہیں ہے

ہم نے تجھے اس دل سے بھلایا تو نہیں ہے

ہر نغمۂ پر درد ہر اک ساز سے پہلے

ہنگامہ بپا ہوتا ہے آغاز سے پہلے

تو جگنو ہے فقط راتوں کے دامن میں بسیرا کر

میں سورج ہوں تو مجھ سے آشنائی کر نہیں سکتا

میں اضطراب کے عالم میں رقص کرتا رہا

کبھی غبار کی صورت کبھی دھواں بن کر

اشک آنکھوں میں لئے آٹھوں پہر دیکھے گا کون

ہم نہیں ہوں گے تو تیری رہ گزر دیکھے گا کون

وہ جس کی راہ میں میں نے دیئے جلائے تھے

گیا وہ شخص مجھے چھوڑ کر اندھیرے میں

ہو نہیں پاتی شاعری افضلؔ

نذر جب تک لہو نہیں کرتا

خودی کی دولت عظمیٰ خدا نے مجھ کو بخشی ہے

قلندر ہوں میں شاہوں کی گدائی کر نہیں سکتا

غموں کی دھوپ میں ملتے ہیں سائباں بن کر

زمیں پہ رہتے ہیں کچھ لوگ آسماں بن کر

اب تو ہر ایک اداکار سے ڈر لگتا ہے

مجھ کو دشمن سے نہیں یار سے ڈر لگتا ہے

وہ جس نے دیکھا نہیں عشق کا کبھی مکتب

میں اس کے ہاتھ میں دل کی کتاب کیا دیتا

یوں علاج دل بیمار کیا جائے گا

شربت‌ دید سے سرشار کیا جائے گا

میں چاہتا تھا کہ اس کو گلاب پیش کروں

وہ خود گلاب تھا اس کو گلاب کیا دیتا