میں تیرے ہدیۂ فرقت پہ کیسے نازاں ہوں

مری جبیں پہ ترا زخم تک حسین نہیں

سب اپنی ذات میں اک انجمن کے مجرم ہیں

کسی وجود میں کچھ فرد جیسا ہے ہی نہیں

بیٹھا ہوا ہوں لگ کے دریچہ سے محو یاس

یہ شام آج میرے برابر اداس ہے

ہر ایک سمت تری یاد کا دھندلکا ہے

ترے خیال کا سورج اتر گیا مجھ میں

میں خود کو دیکھتا ہوں اور بھی حقارت سے

جب اپنا مرتبہ تسلیم کرنے لگتا ہوں

کسی پرند کی چیخوں نے سنگ باری کی

سکوت شام کا شیشہ بکھر گیا مجھ میں

یہ کون تیرے سوا کر سکا اداس مجھے

ترے خیال نے چھیڑی تھی گفتگو کس کی

سخن آباد میں سودائیوں کی دھوم سہی

میرؔ جی شعر کے فن میں مرے استاد رہو