دونوں کا ملنا مشکل ہے دونوں ہیں مجبور بہت

اس کے پاؤں میں مہندی لگی ہے میرے پاؤں میں چھالے ہیں

پھول کھلے ہیں لکھا ہوا ہے توڑو مت

اور مچل کر جی کہتا ہے چھوڑو مت

ایک اسی کو دیکھ نہ پائے ورنہ شہر کی سڑکوں پر

اچھی اچھی پوشاکیں ہیں اچھی صورت والے ہیں

سگریٹ جسے سلگتا ہوا کوئی چھوڑ دے

اس کا دھواں ہوں اور پریشاں دھواں ہوں میں

عشق کے ہجے بھی جو نہ جانیں وہ ہیں عشق کے دعویدار

جیسے غزلیں رٹ کر گاتے ہیں بچے اسکول میں

ان آنکھوں میں ڈال کر جب آنکھیں اس رات

میں ڈوبا تو مل گئے ڈوبے ہوئے جہاز

سکوت ترک تعلق کا اک گراں لمحہ

بنا گیا ہے صداؤں کا سلسلہ مجھ کو

آتا ہوں میں زمانے کی آنکھوں میں رات دن

لیکن خود اپنی نظروں سے اب تک نہاں ہوں میں

گھر کے دکھڑے شہر کے غم اور دیس بدیس کی چنتائیں

ان میں کچھ آوارہ کتے ہیں کچھ ہم نے پالے ہیں

ہر گھڑی اک نیا تقاضا ہے

درد سر بن گیا بدن میرا

رنج و غم اٹھائے ہیں فکر و فن بھی پائے ہیں

زندگی کو جتنا بھی جی سکے جیا ہم نے

کبھی حرم میں ہے کافر تو دیر میں مومن

نہ جانے کیا دل دیوانہ تیرا مذہب ہے

خواب جو دیکھے نہ تھے ان کی سزا تو مل گئی

بارہا دیکھا جنہیں ان کا صلہ ملتا نہیں

چھوتے ہی آشائیں بکھریں جیسے سپنے ٹوٹ گئے

کس نے اٹکائے تھے یہ کاغذ کے پھول ببول میں

وہ جب مجھ کو دیکھ رہی تھی میں نے اس کو دیکھ لیا تھا

بس اتنی سی بات تھی لیکن بڑھتے بڑھتے کتنی بڑھی ہے

دل ہے ویران بیاباں کی طرح

گوشۂ شہر خموشاں کی طرح

دل میں دکھ آنکھوں میں نمی آسماں پر گھٹائیں

اندر باہر اس اور اس اور ہر اور بادل

بے صورت بے جسم آوازیں اندر بھیج رہی ہیں ہوائیں

بند ہیں کمرے کے دروازے لیکن کھڑکی کھلی ہوئی ہے

کرتا ہوں طواف اپنا تو ملتی ہے نئی راہ

قبلہ بھی ہے یہ ذات مرا قبلہ نما بھی

خواہشوں کی بجلیوں کی جلتی بجھتی روشنی

کھینچتی ہے منظروں میں نقشۂ اعصاب سا