چند الفاظ کے موتی ہیں مرے دامن میں

ہے مگر تیری محبت کا تقاضا کچھ اور

باقی ہی کیا رہا ہے تجھے مانگنے کے بعد

بس اک دعا میں چھوٹ گئے ہر دعا سے ہم

آبلوں کا شکوہ کیا ٹھوکروں کا غم کیسا

آدمی محبت میں سب کو بھول جاتا ہے

عشق کے مراحل میں وہ بھی وقت آتا ہے

آفتیں برستی ہیں دل سکون پاتا ہے

سبق ملا ہے یہ اپنوں کا تجربہ کر کے

وہ لوگ پھر بھی غنیمت ہیں جو پرائے ہیں

یہ قدم قدم بلائیں یہ سواد کوئے جاناں

وہ یہیں سے لوٹ جائے جسے زندگی ہو پیاری

اس کے وعدوں سے اتنا تو ثابت ہوا اس کو تھوڑا سا پاس تعلق تو ہے

یہ الگ بات ہے وہ ہے وعدہ شکن یہ بھی کچھ کم نہیں اس نے وعدے کیے

مری زندگی کا حاصل ترے غم کی پاسداری

ترے غم کی آبرو ہے مجھے ہر خوشی سے پیاری

ہمیں آخرت میں عامرؔ وہی عمر کام آئی

جسے کہہ رہی تھی دنیا غم عشق میں گنوا دی

ظاہراً توڑ لیا ہم نے بتوں سے رشتہ

پھر بھی سینے میں صنم خانہ بسا ہے یارو

کتنی پامال امنگوں کا ہے مدفن مت پوچھ

وہ تبسم جو حقیقت میں فغاں ہوتا ہے

عشق سر تا بہ قدم آتش سوزاں ہے مگر

اس میں شعلہ نہ شرارہ نہ دھواں ہوتا ہے

عقل تھک کر لوٹ آئی جادۂ آلام سے

اب جنوں آغاز فرمائے گا اس انجام سے

تھی سیاہیوں کا مسکن مری زندگی کی وادی

ترے حسن کے تصدق مجھے روشنی دکھا دی