جو دل باندھے وہ جادو جانتا ہے

مرا محبوب اردو جانتا ہے

آپ کا کوئی سفر بے سمت بے منزل نہ ہو

زندگی ایسی نہ جینا جس کا مستقبل نہ ہو

کرنا ہے آپ کو جو نئے راستوں کی کھوج

سب جس طرف نہ جائیں ادھر جانا چاہیے

اس بے وفا پہ مرنے کو آمادہ دل نہیں

لیکن وفا کی ضد ہے کہ مر جانا چاہیے

چھین لیں خوشیاں مری آنکھوں سے میری نیند بھی

زندگی تو نے مجھے اب تک دیا کچھ بھی نہیں

کیسا عجیب وقت ہے کوئی بھی ہم سفر نہیں

دھوپ بھی معتبر نہیں سایہ بھی معتبر نہیں

نگاہ چاہیے بس اہل دل فقیروں کی

برا بھی دیکھوں تو مجھ کو بھلا نظر آئے

آپ کی باتوں میں آ کر کھو دیا دل کا سکوں

زندگی میں دیکھیے میری بچا کچھ بھی نہیں

اڑا گئے ہیں بہت دھول جانے والے لوگ

چھٹے غبار تو کچھ راستہ نظر آئے

صحرا سے چلے آ بھی گئے دار و رسن تک

ہونا تھا جنہیں وہ نہ ہمارے ہوئے لوگو

پتہ اس کا تو ہم رندوں سے پوچھو

خدا کو کب یہ سادھو جانتا ہے