jo dil bāñdhe vo jaadū jāntā hai

mirā mahbūb urdu jāntā hai

jo dil bandhe wo jadu jaanta hai

mera mahbub urdu jaanta hai

aap kā koī safar be-samt be-manzil na ho

zindagī aisī na jiinā jis kā mustaqbil na ho

aap ka koi safar be-samt be-manzil na ho

zindagi aisi na jina jis ka mustaqbil na ho

karnā hai aap ko jo na.e rāstoñ kī khoj

sab jis taraf na jaa.eñ udhar jaanā chāhiye

karna hai aap ko jo nae raston ki khoj

sab jis taraf na jaen udhar jaana chahiye

us bevafā pe marne ko āmāda dil nahīñ

lekin vafā kī zid hai ki mar jaanā chāhiye

us bewafa pe marne ko aamada dil nahin

lekin wafa ki zid hai ki mar jaana chahiye

chhīn liiñ ḳhushiyāñ mirī āñkhoñ se merī niiñd bhī

zindagī tū ne mujhe ab tak diyā kuchh bhī nahīñ

chhin lin KHushiyan meri aankhon se meri nind bhi

zindagi tu ne mujhe ab tak diya kuchh bhi nahin

kaisā ajiib vaqt hai koī bhī ham-safar nahīñ

dhuup bhī mo'tabar nahīñ saaya bhī mo'tabar nahīñ

kaisa ajib waqt hai koi bhi ham-safar nahin

dhup bhi mo'tabar nahin saya bhi mo'tabar nahin

nigāh chāhiye bas ahl-e-dil faqīroñ kī

burā bhī dekhūñ to mujh ko bhalā nazar aa.e

nigah chahiye bas ahl-e-dil faqiron ki

bura bhi dekhun to mujh ko bhala nazar aae

aap kī bātoñ meñ aa kar kho diyā dil kā sukūñ

zindagī meñ dekhiye merī bachā kuchh bhī nahīñ

aap ki baaton mein aa kar kho diya dil ka sukun

zindagi mein dekhiye meri bacha kuchh bhi nahin

uḌā ga.e haiñ bahut dhuul jaane vaale log

chhaTe ġhubār to kuchh rāsta nazar aa.e

uDa gae hain bahut dhul jaane wale log

chhaTe ghubar to kuchh rasta nazar aae

sahrā se chale aa bhī ga.e dār-o-rasan tak

honā thā jinheñ vo na hamāre hue logo

sahra se chale aa bhi gae dar-o-rasan tak

hona tha jinhen wo na hamare hue logo

pata is kā to ham rindoñ se pūchho

ḳhudā ko kab ye sādhū jāntā hai

pata is ka to hum rindon se puchho

KHuda ko kab ye sadhu jaanta hai