تجھ سے پردہ نہیں مرے غم کا

تو مری زندگی کا محرم ہے

دل نہ کعبہ ہے نے کلیسا ہے

تیرا گھر ہے حریم مریم ہے

اب نہ وہ جوش وفا ہے نہ وہ انداز طلب

اب بھی لیکن ترے کوچے سے گزر ہوتا ہے

بٹھا کے سامنے تم کو بہار میں پی ہے

تمہارے رند نے توبہ بھی روبرو کر لی

کوئی تو خیر کا پہلو بھی نکلے

اکیلا کس طرح یہ شر رہے گا

خاک نے کتنے بد اطوار کئے ہیں پیدا

یہ نہ ہوتے تو اسی خاک سے کیا کیا ہوتا

خالی بھی تو کر خانۂ دل دنیا سے

اس گھر میں مری جان خدا آئے گا

آؤ خوش ہو کے پیو کچھ نہ کہو واعظ کو

میکدے میں وہ تماشائی ہے کچھ اور نہیں

علاج اس کا گزر جانا ہے جاں سے

گزر جانے کا جاں سے ڈر رہے گا

غلط ہے جذبۂ دل پر نہیں کوئی الزام

خوشی ملی نہ ہمیں جب تو غم کی خو کر لی

میری دنیا میں ابھی رقص شرر ہوتا ہے

جو بھی ہوتا ہے بہ انداز دگر ہوتا ہے

نکلو بھی کبھی سود و زیاں سے ورنہ

کوچے میں ترے کون بھلا آئے گا

کیوں ہوا مجھ کو عنایت کی نظر کا سودا

آج رسوائی ہی رسوائی ہے کچھ اور نہیں