muqaddar se mire donoñ ke donoñ bevafā nikle

na umr-e-bevafā palTī na phir jā kar shabāb aayā

muqaddar se mere donon ke donon bewafa nikle

na umr-e-bewafa palTi na phir ja kar shabab aaya

nīchī nazroñ se kar diyā ghāyal

ab ye samjhe ki ye hayā kyā hai

nichi nazron se kar diya ghayal

ab ye samjhe ki ye haya kya hai

shāyad niyāz-mand ko hāsil niyāz ho

hasrat se tak rahā huuñ tirī rahguzar ko maiñ

shayad niyaz-mand ko hasil niyaz ho

hasrat se tak raha hun teri rahguzar ko main

vo taaza dāstāñ huuñ marne ke ba.ad un ko

aa.egā yaad merā afsāna zindagī kā

wo taza dastan hun marne ke baad un ko

aaega yaad mera afsana zindagi ka

jalva-e-yār dekh kar tuur pe ġhash hue kalīm

aql-o-ḳhirad kā kaam kyā mahfil-e-husn-o-nāz meñ

jalwa-e-yar dekh kar tur pe ghash hue kalim

aql-o-KHirad ka kaam kya mahfil-e-husn-o-naz mein