tire mahal meñ hazāroñ charāġh jalte haiñ

ye merā ghar hai yahāñ dil ke daaġh jalte haiñ

tere mahal mein hazaron charagh jalte hain

ye mera ghar hai yahan dil ke dagh jalte hain

shikār apnī anā kā hai aaj kā insāñ

jise bhī dekhiye tanhā dikhā.ī detā hai

shikar apni ana ka hai aaj ka insan

jise bhi dekhiye tanha dikhai deta hai

log achchhoñ ko bhī kis dil se burā kahte haiñ

ham ko kahne meñ buroñ ko bhī burā lagtā hai

log achchhon ko bhi kis dil se bura kahte hain

hum ko kahne mein buron ko bhi bura lagta hai

duniyā se ḳhatm ho gayā insān kā vajūd

rahnā paḌā hai ham ko darindoñ ke darmiyāñ

duniya se KHatm ho gaya insan ka wajud

rahna paDa hai hum ko darindon ke darmiyan

raushnī jab se mujhe chhoḌ ga.ī

sham.a rotī hai sirhāne mere

raushni jab se mujhe chhoD gai

shama roti hai sirhane mere

un ke hāthoñ se milā thā pī liyā

zahr thā par zā.iqa achchhā lagā

un ke hathon se mila tha pi liya

zahr tha par zaiqa achchha laga

mujh ko ġham kā na kabhī dard kā ehsās rahā

har ḳhushī paas thī jab tak tū mire paas rahā

mujh ko gham ka na kabhi dard ka ehsas raha

har KHushi pas thi jab tak tu mere pas raha

ai chāragaro paas tumhāre na milegī

bīmār-e-mohabbat kī davā aur hī kuchh hai

ai chaaragaro pas tumhaare na milegi

bimar-e-mohabbat ki dawa aur hi kuchh hai

khilnā har ek phuul kā 'asġhar' hai mo.ajaza

murjhātī hai kalī bhī bahāroñ ke darmiyāñ

khilna har ek phul ka 'asghar' hai moajaza

murjhati hai kali bhi bahaaron ke darmiyan

jitnā ronā thā ro chuke aadam

aur ro.egā aadmī kab tak

jitna rona tha ro chuke aadam

aur roega aadmi kab tak

paḌhte the kitāboñ meñ qayāmat kā samāñ

nepal meñ kuchh is kā namūna dekhā

paDhte the kitabon mein qayamat ka saman

nepal mein kuchh is ka namuna dekha

tū ne ab tak jise nahīñ samjhā

aur phir us kī bandagī kab tak

tu ne ab tak jise nahin samjha

aur phir us ki bandagi kab tak

zindagī se samjhautā aaj ho gayā kaise

roz roz to aise sānehe nahīñ hote

zindagi se samjhauta aaj ho gaya kaise

roz roz to aise sanehe nahin hote