bahut hī kam ko milī haiñ mohabbateñ 'jānif'

ziyāda-tar ko to mahbūb ne du'ā dī hai

bahut hi kam ko mili hain mohabbaten 'jaanif'

ziyaada-tar ko to mahbub ne du'a di hai

maiñ roz kahīñ kho ke lagātā huuñ sadā.eñ

maiñ roz mujhe DhūñD ke laatā huuñ kahīñ se

main roz kahin kho ke lagata hun sadaen

main roz mujhe DhunD ke lata hun kahin se

hameñ banñā paḌegā alien varna mire pyāre

tujhe bhī khā.egā aadam mujhe bhī khā.egā aadam

hamein banna paDega alien warna mere pyare

tujhe bhi khaega aadam mujhe bhi khaega aadam

tū ḳhudā se bhī duur hai laḌkī

aur dil kaa.eñ kaa.eñ kar rahā hai

tu KHuda se bhi dur hai laDki

aur dil kaen kaen kar raha hai

udaas logoñ ke māthoñ ko chūmte rahnā

unhī ki vaj.h se bar-'aks ho ga.e tum log

udas logon ke mathon ko chumte rahna

unhi ki wajh se bar-'aks ho gae tum log

ye kaise log tire ās-pās ghūmte haiñ

inheñ to dekh ke merā dimāġh ghūmtā hai

ye kaise log tere aas-pas ghumte hain

inhen to dekh ke mera dimagh ghumta hai

kaun huuñ maiñ mujhe nahīñ mā'lūm

kaun ho tum patā lagā rahā huuñ

kaun hun main mujhe nahin ma'lum

kaun ho tum pata laga raha hun

hijr kī jang kā sipāhī huuñ

laḌ rahā huuñ tire firāq se maiñ

hijr ki jang ka sipahi hun

laD raha hun tere firaq se main

bahisht kyā hai kisī ke liye nahīñ mā'lūm

mire liye tirī āġhosh hī hai ḳhuld-e-barīñ

bahisht kya hai kisi ke liye nahin ma'lum

mere liye teri aaghosh hi hai KHuld-e-barin

ek hī zehn hai hamāre paas

aur haiñ is pe kā.enāteñ savār

ek hi zehn hai hamare pas

aur hain is pe kaenaten sawar

maiñ tumhāre baġhair aisā huuñ

jis tarah diin hai nabī ke baġhair

main tumhaare baghair aisa hun

jis tarah din hai nabi ke baghair

mirā sab kuchh ho tum lekin yahāñ par

ḳhudā sab kuchh nahīñ detā kisī ko

mera sab kuchh ho tum lekin yahan par

KHuda sab kuchh nahin deta kisi ko