کسے کہیں کہ رفاقت کا داغ ہے دل پر

بچھڑنے والا تو کھل کر کبھی ملا ہی نہ تھا

جانے والے کو کہاں روک سکا ہے کوئی

تم چلے ہو تو کوئی روکنے والا بھی نہیں

دیوار خستگی ہوں مجھے ہاتھ مت لگا

میں گر پڑوں گا دیکھ مجھے آسرا نہ دے

خفا نہ ہو کہ ترا حسن ہی کچھ ایسا تھا

میں تجھ سے پیار نہ کرتا تو اور کیا کرتا

جسے درپیش جدائی ہو اسے کیا معلوم

کون سی بات کو کس طرح بیاں ہونا ہے

ہمارے ہاتھ فقط ریت کے صدف آئے

کہ ساحلوں پہ ستارہ کوئی رہا ہی نہ تھا

ہم کو پہچان کہ اے بزم چمن زار وجود

ہم نہ ہوتے تو تجھے کس نے سنوارا ہوتا

ذرا سی بات پہ کیا کیا فسانہ سازی ہے

میں خود بھی چاہتا کب تھا کہ داستاں نہ بنے

ہم نے ہر خواب کو تعبیر عطا کی اسلمؔ

ورنہ ممکن تھا کہ ہر نقش ادھورا ہوتا

اڑا ہے رفتہ رفتہ رنگ تصویر محبت کا

ہوئی ہے رسم الفت بے وقار آہستہ آہستہ

رگ ہر ساز یہ کہتی ہے کہ اے نغمہ طراز

مجھ کو اک سلطنت صوت و صدا چاہیے تھی

جوئے نغمات پہ تصویر سی لرزاں دیکھی

لب تصویر پہ ٹھہرا ہوا نغمہ دیکھا