use ab bhuul jaane kā irāda kar liyā hai

bharosa ġhāliban ḳhud par ziyāda kar liyā hai

use ab bhul jaane ka irada kar liya hai

bharosa ghaaliban KHud par ziyaada kar liya hai

jis kī ḳhātir maiñ bhulā baiThā thā apne aap ko

ab usī ke bhuul jaane kā hunar bhī dekhnā

jis ki KHatir main bhula baiTha tha apne aap ko

ab usi ke bhul jaane ka hunar bhi dekhna

vo ek shaḳhs ki manzil bhī rāstā bhī hai

vahī duā bhī vahī hāsil-e-duā bhī hai

wo ek shaKHs ki manzil bhi rasta bhi hai

wahi dua bhi wahi hasil-e-dua bhi hai

lagtā nahīñ ki us se marāsim bahāl hoñ

maiñ kyā karūñ ki thoḌā sā pāgal to maiñ bhī huuñ

lagta nahin ki us se marasim bahaal hon

main kya karun ki thoDa sa pagal to main bhi hun

ye kis azaab meñ us ne phañsā diyā mujh ko

ki us kā dhyān koī kaam karne detā nahīñ

ye kis azab mein us ne phansa diya mujh ko

ki us ka dhyan koi kaam karne deta nahin

gum huā jaatā hai koī manziloñ kī gard meñ

zindagī bhar kī masāfat rā.egāñ hone ko hai

gum hua jata hai koi manzilon ki gard mein

zindagi bhar ki masafat raegan hone ko hai

aa.e haiñ log raat kī dahlīz phāñd kar

un ke liye naved-e-sahar honī chāhiye

aae hain log raat ki dahliz phand kar

un ke liye nawed-e-sahar honi chahiye

diloñ se ḳhauf nikaltā nahīñ azāboñ kā

zamīñ ne oḌh liye sar par āsmāñ phir se

dilon se KHauf nikalta nahin azabon ka

zamin ne oDh liye sar par aasman phir se