جو ہو سکے تو چلے آؤ آج میری طرف

ملے بھی دیر ہوئی اور جی اداس بھی ہے

کیا کیا فراغتیں تھیں میسر حیات کو

وہ دن بھی تھے کہ تیرے سوا کوئی غم نہ تھا

خلوص نیت رہبر پہ منحصر ہے عظیمؔ

مقام عشق بہت دور بھی ہے پاس بھی ہے

درد محرومئ جاوید بھی اک دولت ہے

اہل غم بھی ترے شرمندۂ احساں نکلے

آج تک یاد ہے وہ شام جدائی کا سماں

تیری آواز کی لرزش ترے لہجے کی تھکن

کچھ نقش تری یاد کے باقی ہیں ابھی تک

دل بے سر و ساماں سہی ویراں تو نہیں ہے

کچھ آپ کا غم کچھ غم جاں کچھ غم دنیا

دامن میں مرے پھول بھی ہیں خار بھی خس بھی

ہم درد کے مارے ہی گراں جاں ہیں وگرنہ

جینا تری فرقت میں کچھ آساں تو نہیں ہے

تجھ سے مل کے بھی تیرا انتظار رہتا ہے

صبح روئے خنداں سے شام زلف برہم تک

بے خودی میں جسے ہم سمجھے ہیں تیرا دامن

عین ممکن ہے کہ اپنا ہی گریباں نکلے

تنہائی کا سناٹا اور آتی جاتی راتیں

تیری یاد نہ اور کوئی غم پھر بھی نیند نہ آئے

ایک درد ہستی نے عمر بھر رفاقت کی

ورنہ ساتھ دیتا ہے کون آخری دم تک

ٹوٹا تو عزیز اور ہوا اہل وفا کو

دل بھی کہیں اس شوخ کا پیماں تو نہیں ہے

بیتابیٔ حیات میں آسودگی بھی تھی

کچھ تیرا غم بھی تھا غم دوراں کے ساتھ ساتھ

وہی یکسانیت شام و سحر ہے کہ جو تھی

زندگی دست بہ دل خاک بسر ہے کہ جو تھی

اب امتیاز ظاہر و باطن بھی مٹ گیا

دل چاک ہو رہا ہے گریباں کے ساتھ ساتھ

اب میرے ساتھ ان کی نظر بھی ہے بے قرار

نشتر تڑپ رہے ہیں رگ جاں کے ساتھ ساتھ