طویل عمر کی ڈھیروں دعائیں بھیجی ہیں

مرے چراغ کو پانی سے بھرنے والوں نے

ہار کو جیت کے امکان سے باندھے ہوئے رکھ

اپنی مشکل کسی آسان سے باندھے ہوئے رکھ

ہارے ہوئے لوگوں کی کہانی کی طرح ہیں

ہم لوگ بھی بہتے ہوئے پانی کی طرح ہیں

مجھ کو پہچان تو اے وقت میں وہ ہوں جو فقط

ایک غلطی کے لئے عرش بریں سے نکلا

تم محبت کا اسے نام بھی دے لو لیکن

یہ تو قصہ کسی ہاری ہوئی تقدیر کا ہے

چپکے سے گزرتے ہیں خبر بھی نہیں ہوتی

دن رات بھی کم بخت جوانی کی طرح ہیں

چند قدموں سے زیادہ نہیں چلنے پاتے

جس کو دیکھو وہی قیدی کسی زنجیر کا ہے

کسی کے نام پہ ننھے دیے جلاتے ہوئے

خدا کو بھول گئے نیکیاں کماتے ہوئے

تو بات نہیں سنتا یہی حل ہے پھر اس کا

جھگڑے کے لیے وقت نکالیں کوئی ہم بھی

یہ خزانے کا کوئی سانپ بنا ہوتا ہے

آدمی عشق میں دنیا سے برا ہوتا ہے

ایڑیاں مار کے زخمی بھی ہوئے لوگ مگر

کوئی چشمہ نہیں زرخیز زمیں سے نکلا

تو آ گیا ہے تو اب یاد بھی نہیں مجھ کو

یہ عشق میرا برا حال کرنے والا تھا

کماں نہ تیر نہ تلوار اپنی ہوتی ہے

مگر یہ دنیا کہ ہر بار اپنی ہوتی ہے

کس لئے اس سے نکلنے کی دعائیں مانگوں

مجھ کو معلوم ہے منجدھار سے آگے کیا ہے

نہ ہاتھ سوکھ کے جھڑتے ہیں جسم سے اپنے

نہ شاخ کوئی ثمر بار اپنی ہوتی ہے