ہے مسلماں کو ہمیشہ آب زمزم کی تلاش

اور ہر اک برہمن گنگ و جمن میں مست ہے

نہیں دنیا میں آزادی کسی کو

ہے دن میں شمس اور شب کو قمر بند

پتا ملتا نہیں اس بے نشاں کا

لیے پھرتا ہے قاصد جا بجا خط

زاہدا کعبے کو جاتا ہے تو کر یاد خدا

پھر جہازوں میں خیال ناخدا کرتا ہے کیوں

ظاہری وعظ سے ہے کیا حاصل

اپنے باطن کو صاف کر واعظ

نہیں بت خانہ و کعبہ پہ موقوف

ہوا ہر ایک پتھر میں شرر بند

ڈھونڈھ کر دل میں نکالا تجھ کو یار

تو نے اب محنت مری بیکار کی

عشق میں دل سے ہم ہوئے محو تمہارے اے بتو

خالی ہیں چشم و دل کرو ان میں گزر کسی طرح

میں برہمن و شیخ کی تکرار سے سمجھا

پایا نہیں اس یار کو جھنجھلائے ہوئے ہیں

کہتا ہے یار جرم کی پاتے ہو تم سزا

انصاف اگر نہیں ہے تو بیداد بھی نہیں

جا بجا ہم کو رہی جلوۂ جاناں کی تلاش

دیر و کعبہ میں پھرے صحبت رہباں میں رہے

رشتۂ الفت رگ جاں میں بتوں کا پڑ گیا

اب بظاہر شغل ہے زنار کا فعل عبث