مرا گھر جلانے والے مجھے فکر ہے تری بھی

کہ ہوا کا رخ جو بدلا ترا گھر بھی جل نہ جائے

یوں تو لڑائی جھگڑے کی عادت نہیں مجھے

پھر بھی غلط کیا تھا گریبان چھوڑ کر

ملا ہے تخت جو جمہوریت میں بندر کو

تو ان سے کیا سبھی جنگل کے شیر ڈر جائیں

سب حفاظت کر رہیں ہیں مستقل دیوار کی

جب کہ حملہ ہو رہا ہے مستقل بنیاد پر

خود پر کسی کو ہنسنے کا موقع نہیں دیا

پوچھا کسی نے حال تو سگریٹ جلا لیا

بچوں کو بھوکے پیٹ سلانے کے بعد ہم

کیسے غزل کے شعر سنائیں جہاں پناہ

کام کچھ تو کیجئے اپنی بقا کے واسطے

انقلابی نام سے تو انقلاب آتا نہیں

جلائے میری ہی سگریٹ مری عیادت پر

یہ میرا دوست بھی ہے کائیاں عجیب و غریب

نظر اتارتی ہیں وقت وقت پر میری

ملی ہیں ماؤں کو بینائیاں عجیب و غریب

یہ کیا کہ ہر وقت جی حضوری میں سر جھکائے کھڑے ہو احیاؔ

اگر بغاوت کا پر تمہارا بھی پھڑپھڑائے تو سر اٹھاؤ

آ ہی جاتے ہو خواب میں ہر شب

تم مرا کتنا دھیان رکھتے ہو

دل کے اندر بھی چار خانے ہیں

کوئی کیسے نہ بد گماں ہوگا

سکون کتنا تھا جھونپڑی میں

محل میں آ کر پتا چلا ہے

خوشبو بکھیرنا مری فطرت ہے دوستو

خوشبو بکھیرتا ہوں میں گلدان چھوڑ کر

کھٹک رہا ہوں مسلسل کسی کی آنکھوں میں

اسی لئے تو نشانے پہ بار بار ہوں میں

مٹتی نہیں تاریخ سے کوئی بھی عبارت

تاریخ لکھے گی کہ لکھا کاٹ رہے ہیں

آتا نہیں عدو سے یاری مجھے نبھانا

ملتا نہیں وہ دل سے پھر ہاتھ کیا ملانا

چین ملتا ہے ترے شوق کو پورا کر کے

ورنہ اے لخت جگر کون کمانے نکلے

جس روشنی پہ عکس کا دار و مدار ہے

اس روشنی کو کون دکھائے گا آئنہ

پرانے پتوں کو جھاڑ دینا نئے نویلوں کو راہ دینا

خدا کے بندے اگر یہ کار خدا نہیں ہے تو اور کیا ہے