aurat huuñ magar sūrat-e-kohsār khaḌī huuñ

ik sach ke tahaffuz ke liye sab se laḌī huuñ

aurat hun magar surat-e-kohsar khaDi hun

ek sach ke tahaffuz ke liye sab se laDi hun

alfāz na āvāz na hamrāz na dam-sāz

ye kaise dorāhe pe maiñ ḳhāmosh khaḌī huuñ

alfaz na aawaz na hamraaz na dam-saz

ye kaise dorahe pe main KHamosh khaDi hun

vo aa.e to rang sañvarne lagte haiñ

jaise bichhḌā yaar bhī koī mausam hai

wo aae to rang sanwarne lagte hain

jaise bichhDa yar bhi koi mausam hai

maiñ bhī na thī kalām meñ itnī farāḳh-dil

kuchh vo bhī iḳhtisār se aage na jā sakā

main bhi na thi kalam mein itni faraKH-dil

kuchh wo bhi iKHtisar se aage na ja saka

jis bādal ne sukh barsāyā jis chhāñv meñ priit milī

āñkheñ khol ke dekhā to vo sab mausam lamhātī the

jis baadal ne sukh barsaya jis chhanw mein prit mili

aankhen khol ke dekha to wo sab mausam lamhati the

ye chāñd mujh ko hī tak rahā hai

tumheñ hamesha ye shak rahā hai

ye chand mujh ko hi tak raha hai

tumhein hamesha ye shak raha hai

maiñ kisī ke saath huuñ aur vo kisī ke saath hai

ik musalsal hādisa ye zindagī ke saath hai

main kisi ke sath hun aur wo kisi ke sath hai

ek musalsal hadisa ye zindagi ke sath hai

kartā rahā vo mujh pe sadā mehrbāniyāñ

kuchh aur DhūñDhtī rahī maiñ mehrbān meñ

karta raha wo mujh pe sada mehrbaniyan

kuchh aur DhunDhti rahi main mehrban mein

kisī ḳhayāl kī dastak kisī umiid kī lau

maiñ thak ke soī to phir se jagā diyā us ne

kisi KHayal ki dastak kisi umid ki lau

main thak ke soi to phir se jaga diya us ne

maslak vafā ke baab meñ vo iḳhtiyār kar

maiñ jhuuT bhī kahūñ to mirā e'tibār kar

maslak wafa ke bab mein wo iKHtiyar kar

main jhuT bhi kahun to mera e'tibar kar

ajab dar par savālī thā maiñ us ko phuul kyā detī

vo ḳhud gulshan kā maalī thā maiñ us ko phuul kyā detī

ajab dar par sawali tha main us ko phul kya deti

wo KHud gulshan ka mali tha main us ko phul kya deti

ḳhizāñ ke āḳhirī din the vo ḳhushbū māñgne aayā

mirā dāman hī ḳhālī thā maiñ us ko phuul kyā detī

KHizan ke aaKHiri din the wo KHushbu mangne aaya

mera daman hi KHali tha main us ko phul kya deti

maañ ban chukī huuñ maiñ bhī magar us se kyā kahūñ

jo apnī maañ ke pyaar se aage na jā sakā

man ban chuki hun main bhi magar us se kya kahun

jo apni man ke pyar se aage na ja saka

kisī kī jang laḌnī paḌ ga.ī hai

kisī ke faisle mahñge paḌe haiñ

kisi ki jang laDni paD gai hai

kisi ke faisle mahnge paDe hain

sadiyoñ kī raakh vaqt kī jholī meñ Daal kar

maiñ jā rahī huuñ ab tū mirā intizār kar

sadiyon ki rakh waqt ki jholi mein Dal kar

main ja rahi hun ab tu mera intizar kar

mohabbat muntaqil hone lagī hai

maiñ ab bachchoñ kī hotī jā rahī huuñ

mohabbat muntaqil hone lagi hai

main ab bachchon ki hoti ja rahi hun

ḳhvāb jo bhī dekhe the ban ga.e sharāre se

dekhnā hai ab us ko dūsre kināre se

KHwab jo bhi dekhe the ban gae sharare se

dekhna hai ab us ko dusre kinare se

vaqt bhī ajab shai hai haath hī nahīñ aayā

umr bhar uThā.e haiñ dil ne bas ḳhasāre se

waqt bhi ajab shai hai hath hi nahin aaya

umr bhar uThae hain dil ne bas KHasare se

bachpan se len-den thā us kī sarisht meñ

bātoñ meñ kārobār se aage na jā sakā

bachpan se len-den tha us ki sarisht mein

baaton mein karobar se aage na ja saka

vo jā chukā hai magar phuul khil rahe haiñ abhī

mohabbatoñ ko tamāshā banā diyā us ne

wo ja chuka hai magar phul khil rahe hain abhi

mohabbaton ko tamasha bana diya us ne

ajiib rut hai ye hijr-o-visāl se aage

kamāl hone lagā hai kamāl se aage

ajib rut hai ye hijr-o-visal se aage

kamal hone laga hai kamal se aage

ajab dar par savālī thā maiñ us ko phuul kyā detī

vo ḳhud gulshan kā maalī thā maiñ us ko phuul kyā detī

ajab dar par sawali tha main us ko phul kya deti

wo KHud gulshan ka mali tha main us ko phul kya deti

vo ek lamha jo titlī sā apne biich meñ hai

use maiñ le ke chalī māh-o-sāl se aage

wo ek lamha jo titli sa apne bich mein hai

use main le ke chali mah-o-sal se aage

ab sochtī huuñ kyoñ ye safar dā.ere kā thā

maiñ us ke par lagā.e hue thī uḌaan meñ

ab sochti hun kyon ye safar daere ka tha

main us ke par lagae hue thi uDan mein