الفاظ نہ آواز نہ ہم راز نہ دم ساز

یہ کیسے دوراہے پہ میں خاموش کھڑی ہوں

عورت ہوں مگر صورت کہسار کھڑی ہوں

اک سچ کے تحفظ کے لیے سب سے لڑی ہوں

وہ آئے تو رنگ سنورنے لگتے ہیں

جیسے بچھڑا یار بھی کوئی موسم ہے

میں بھی نہ تھی کلام میں اتنی فراخ دل

کچھ وہ بھی اختصار سے آگے نہ جا سکا

یہ چاند مجھ کو ہی تک رہا ہے

تمہیں ہمیشہ یہ شک رہا ہے

جس بادل نے سکھ برسایا جس چھاؤں میں پریت ملی

آنکھیں کھول کے دیکھا تو وہ سب موسم لمحاتی تھے

میں کسی کے ساتھ ہوں اور وہ کسی کے ساتھ ہے

اک مسلسل حادثہ یہ زندگی کے ساتھ ہے

خزاں کے آخری دن تھے وہ خوشبو مانگنے آیا

مرا دامن ہی خالی تھا میں اس کو پھول کیا دیتی

محبت منتقل ہونے لگی ہے

میں اب بچوں کی ہوتی جا رہی ہوں

عجب در پر سوالی تھا میں اس کو پھول کیا دیتی

وہ خود گلشن کا مالی تھا میں اس کو پھول کیا دیتی

مسلک وفا کے باب میں وہ اختیار کر

میں جھوٹ بھی کہوں تو مرا اعتبار کر

ماں بن چکی ہوں میں بھی مگر اس سے کیا کہوں

جو اپنی ماں کے پیار سے آگے نہ جا سکا

وہ جا چکا ہے مگر پھول کھل رہے ہیں ابھی

محبتوں کو تماشا بنا دیا اس نے

صدیوں کی راکھ وقت کی جھولی میں ڈال کر

میں جا رہی ہوں اب تو مرا انتظار کر

کرتا رہا وہ مجھ پہ سدا مہربانیاں

کچھ اور ڈھونڈھتی رہی میں مہربان میں

عجب در پر سوالی تھا میں اس کو پھول کیا دیتی

وہ خود گلشن کا مالی تھا میں اس کو پھول کیا دیتی

کسی کی جنگ لڑنی پڑ گئی ہے

کسی کے فیصلے مہنگے پڑے ہیں

کسی خیال کی دستک کسی امید کی لو

میں تھک کے سوئی تو پھر سے جگا دیا اس نے

وقت بھی عجب شے ہے ہاتھ ہی نہیں آیا

عمر بھر اٹھائے ہیں دل نے بس خسارے سے

عجیب رت ہے یہ ہجر و وصال سے آگے

کمال ہونے لگا ہے کمال سے آگے

خواب جو بھی دیکھے تھے بن گئے شرارے سے

دیکھنا ہے اب اس کو دوسرے کنارے سے

اب سوچتی ہوں کیوں یہ سفر دائرے کا تھا

میں اس کے پر لگائے ہوئے تھی اڑان میں

وہ ایک لمحہ جو تتلی سا اپنے بیچ میں ہے

اسے میں لے کے چلی ماہ و سال سے آگے

بچپن سے لین دین تھا اس کی سرشت میں

باتوں میں کاروبار سے آگے نہ جا سکا