عمر بھر ملنے نہیں دیتی ہیں اب تو رنجشیں

وقت ہم سے روٹھ جانے کی ادا تک لے گیا

جنہیں تاریخ بھی لکھتے ڈرے گی

وہ ہنگامے یہاں ہونے لگے ہیں

بہت سی باتیں زباں سے کہی نہیں جاتیں

سوال کر کے اسے دیکھنا ضروری ہے

ہماری فتح کے انداز دنیا سے نرالے ہیں

کہ پرچم کی جگہ نیزے پہ اپنا سر نکلتا ہے

مدعا اظہار سے کھلتا نہیں ہے

یہ زبان بے زبانی اور ہے

کتابوں سے نہ دانش کی فراوانی سے آیا ہے

سلیقہ زندگی کا دل کی نادانی سے آیا ہے

اب کسی اور کا تم ذکر نہ کرنا مجھ سے

ورنہ اک خواب جو آنکھوں میں ہے مر جائے گا

ہمیں پہ ختم ہیں جور و ستم زمانے کے

ہمارے بعد اسے کس کی آرزو ہوگی

ستاروں کی طرح الفاظ کی ضو بڑھتی جاتی ہے

غزل میں حسن اس چہرے کی تابانی سے آیا ہے

ہر ایک آنکھ میں آنسو ہر ایک لب پہ فغاں

یہ ایک شور قیامت سا کوبکو کیا ہے

جو تو نہیں ہے تو لگتا ہے اب کہ تو کیا ہے

تمام عالم وحشت یہ چار سو کیا ہے

عمر بھر عہد تعلق کے نگہدار رہے

اپنے بارے میں کوئی خواب نہ دیکھا ہم نے