نہ کر شمار کہ ہر شے گنی نہیں جاتی

یہ زندگی ہے حسابوں سے جی نہیں جاتی

سنتے ہیں کہ ان راہوں میں مجنوں اور فرہاد لٹے

لیکن اب آدھے رستے سے لوٹ کے واپس جائے کون

کمرے میں آ کے بیٹھ گئی دھوپ میز پر

بچوں نے کھلکھلا کے مجھے بھی جگا دیا

رات کو خواب بہت دیکھے ہیں

آج غم کل سے ذرا ہلکا ہے

وہی دو چار چہرے اجنبی سے

انہیں کو پھر سے دہرانا پڑے گا

یہ سورج کیوں بھٹکتا پھر رہا ہے

مرے اندر اتر جاتا تو سوتا

سورج اونچا ہو کر میرے آنگن میں بھی آیا ہے

پہلے نیچا تھا تو اونچے میناروں پر بیٹھا تھا

یہ بستی کب درندوں سے تھی خالی

میں پھر بھی ٹھیک لوگوں میں رہا ہوں

اسے معلوم ہے میں سرپھرا ہوں

مگر خوش ہے کہ اس کو چاہتا ہوں

مانگنے سے ہوا ہے وہ خود سر

کچھ دنوں کچھ نہ مانگ کر دیکھو

ہر اک شے خون میں ڈوبی ہوئی ہے

کوئی اس طرح سے پیدا نہ ہوتا