ḳhudā badal na sakā aadmī ko aaj bhī 'hosh'

aur ab tak aadmī ne saikḌoñ ḳhudā badle

KHuda badal na saka aadmi ko aaj bhi 'hosh'

aur ab tak aadmi ne saikDon KHuda badle

dīvār un ke ghar kī mirī dhuup le ga.ī

ye baat bhūlne meñ zamāna lagā mujhe

diwar un ke ghar ki meri dhup le gai

ye baat bhulne mein zamana laga mujhe

miTTī meñ kitne phuul paḌe sūkhte rahe

rañgīn pattharoñ se bahaltā rahā huuñ maiñ

miTTi mein kitne phul paDe sukhte rahe

rangin pattharon se bahalta raha hun main

TuuT kar ruuh meñ shīshoñ kī tarah chubhte haiñ

phir bhī har aadmī ḳhvāboñ kā tamannā.ī hai

TuT kar ruh mein shishon ki tarah chubhte hain

phir bhi har aadmi KHwabon ka tamannai hai

zikr-e-aslāf se behtar hai ki ḳhāmosh raheñ

kal na.ī nasl meñ ham log bhī būḌhe hoñge

zikr-e-aslaf se behtar hai ki KHamosh rahen

kal nai nasl mein hum log bhi buDhe honge

Dūbne vaale ko sāhil se sadā.eñ mat do

vo to Dūbegā magar Dūbnā mushkil hogā

Dubne wale ko sahil se sadaen mat do

wo to Dubega magar Dubna mushkil hoga

kyā sitam karte haiñ miTTī ke khilaune vaale

raam ko rakkhe hue baiThe haiñ rāvan ke qarīb

kya sitam karte hain miTTi ke khilaune wale

ram ko rakkhe hue baiThe hain rawan ke qarib

ham bhī karte raheñ taqāzā roz

tum bhī kahte raho ki aaj nahīñ

hum bhi karte rahen taqaza roz

tum bhi kahte raho ki aaj nahin

aadmī pahle bhī nañgā thā magar jism talak

aaj to ruuh ko bhī ham ne barahna paayā

aadmi pahle bhi nanga tha magar jism talak

aaj to ruh ko bhi hum ne barahna paya

mere hī paañv mire sab se baḌe dushman haiñ

jab bhī uThte haiñ usī dar kī taraf jaate haiñ

mere hi panw mere sab se baDe dushman hain

jab bhi uThte hain usi dar ki taraf jate hain

jo saa.e bichhāte haiñ phal phuul luTāte haiñ

ab aise daraḳhtoñ ko insān kahā jaa.e

jo sae bichhate hain phal phul luTate hain

ab aise daraKHton ko insan kaha jae

bachche khulī fazā meñ kahāñ tak nikal ga.e

ham log ab bhī qaid isī bām-o-dar meñ haiñ

bachche khuli faza mein kahan tak nikal gae

hum log ab bhi qaid isi baam-o-dar mein hain

jo hādisa ki mere liye dardnāk thā

vo dūsroñ se sun ke fasāna lagā mujhe

jo hadisa ki mere liye dardnak tha

wo dusron se sun ke fasana laga mujhe

sāġhar nahīñ ki jhuum ke uTThe uThā liyā

ye zindagī kā bojh hai mil kar uThā.iye

saghar nahin ki jhum ke uTThe uTha liya

ye zindagi ka bojh hai mil kar uThaiye

kho ga.ī jā ke nazar yuuñ ruḳh-e-raushan ke qarīb

jaise kho jaatī hai beva koī dulhan ke qarīb

kho gai ja ke nazar yun ruKH-e-raushan ke qarib

jaise kho jati hai bewa koi dulhan ke qarib

jaane kis kis kā galā kaTtā pas-e-parda-e-ishq

khul ga.e merī shahādat meñ sitamgar kitne

jaane kis kis ka gala kaTta pas-e-parda-e-ishq

khul gae meri shahadat mein sitamgar kitne

gir bhī jaatī nahīñ kam-baḳht ki fursat ho jaa.e

kauñdtī rahtī hai bijlī mire ḳhirman ke qarīb

gir bhi jati nahin kam-baKHt ki fursat ho jae

kaundti rahti hai bijli mere KHirman ke qarib

aane vaale daur meñ jo pā.egā paiġhambarī

merā chehra merā dil merī zabāñ le jā.egā

aane wale daur mein jo paega paighambari

mera chehra mera dil meri zaban le jaega