گہر سمجھا تھا لیکن سنگ نکلا

کسی کا ظرف کتنا تنگ نکلا

دیکھا ہے محبت کو عبادت کی نظر سے

نفرت کے عوامل ہمیں معیوب رہے ہیں

امن کیفیؔ ہو نہیں سکتا کبھی

جب تلک ظلم و ستم موجود ہے

خزاں کا دور بھی آتا ہے ایک دن کیفیؔ

سدا بہار کہاں تک درخت رہتے ہیں

پھولوں کا تبسم بھی وہ پہلا سا نہیں ہے

گلشن میں بھی چلتی ہے ہوا اور طرح کی

محبتوں کو بھی اس نے خطا قرار دیا

مگر یہ جرم ہمیں بار بار کرنا ہے

میں ایسے حسن ظن کو خدا مانتا نہیں

آہوں کے احتجاج سے جو ماورا رہے

یہی نہیں کہ نگاہوں کو اشک بار کیا

ترے فراق میں دامن بھی تار تار کیا

اٹے ہوئے ہیں فقیروں کے پیرہن کیفیؔ

جہاں نے بھیک میں مٹی بکھیر کر دی ہے

غزل کے رنگ میں ملبوس ہو کر

رباب درد سے آہنگ نکلا

افسوس معبدوں میں خدا بیچتے ہیں لوگ

اب معنیٔ سزا و جزا کچھ نہیں رہا