guhar samjhā thā lekin sañg niklā

kisī kā zarf kitnā tañg niklā

guhar samjha tha lekin sang nikla

kisi ka zarf kitna tang nikla

amn 'kaifī' ho nahīñ saktā kabhī

jab talak zulm-o-sitam maujūd hai

amn 'kaifi' ho nahin sakta kabhi

jab talak zulm-o-sitam maujud hai

dekhā hai mohabbat ko ibādat kī nazar se

nafrat ke avāmil hameñ ma.ayūb rahe haiñ

dekha hai mohabbat ko ibaadat ki nazar se

nafrat ke awamil hamein mayub rahe hain

ḳhizāñ kā daur bhī aatā hai ek din 'kaifī'

sadā-bahār kahāñ tak daraḳht rahte haiñ

KHizan ka daur bhi aata hai ek din 'kaifi'

sada-bahaar kahan tak daraKHt rahte hain

mohabbatoñ ko bhī us ne ḳhatā qarār diyā

magar ye jurm hameñ baar baar karnā hai

mohabbaton ko bhi us ne KHata qarar diya

magar ye jurm hamein bar bar karna hai

phūloñ kā tabassum bhī vo pahlā sā nahīñ hai

gulshan meñ bhī chaltī hai havā aur tarah kī

phulon ka tabassum bhi wo pahla sa nahin hai

gulshan mein bhi chalti hai hawa aur tarah ki

yahī nahīñ ki nigāhoñ ko ashk-bār kiyā

tire firāq meñ dāman bhī taar taar kiyā

yahi nahin ki nigahon ko ashk-bar kiya

tere firaq mein daman bhi tar tar kiya

aTe hue haiñ faqīroñ ke pairahan 'kaifī'

jahāñ ne bhiik meñ miTTī bikher kar dī hai

aTe hue hain faqiron ke pairahan 'kaifi'

jahan ne bhik mein miTTi bikher kar di hai

maiñ aise husn-e-zan ko ḳhudā māntā nahīñ

aahoñ ke ehtijāj se jo māvarā rahe

main aise husn-e-zan ko KHuda manta nahin

aahon ke ehtijaj se jo mawara rahe

ġhazal ke rañg meñ malbūs ho kar

rubāb-e-dard se āhañg niklā

ghazal ke rang mein malbus ho kar

rubab-e-dard se aahang nikla

afsos mābadoñ meñ ḳhudā bechte haiñ log

ab ma.anī-e-sazā-o-jazā kuchh nahīñ rahā

afsos mabadon mein KHuda bechte hain log

ab mani-e-saza-o-jaza kuchh nahin raha