بہت حیرت زدہ ہے آئنہ بھی

کہ چہرے پر کوئی چہرہ نہیں ہے

نیند مت ڈھونڈ میری آنکھوں میں

سلوٹیں دیکھ میرے بستر پر

اس کو مطلب کا جب ملا موسم

رنگ اس کے تھے دیکھنے والے

تو بھی دیکھے گا ذرا رنگ اتر لیں تیرے

ہم ہی رکھتے ہیں تجھے یاد کہ سب رکھتے ہیں

یہ اس کے لمس کا جادو نہیں تو پھر کیا ہے

ہوا نے چوما ہے مجھ کو گلے ملی ہے شام

کیوں مری داستاں کا حصہ ہیں

جو مری داستاں کے تھے ہی نہیں

ایسا ہوں بد گمان کہ دستک تو اس نے دی

لیکن مرا خیال ہوا کی طرف گیا

یہ گواہی ترے سفر کی ہے

یہ تھکن کیوں اتارتا ہے میاں

سلوک ایسا نہیں اس کا پھر بھی جانے کیوں

وہ یاد آئے تو دل سے دعا نکلتی ہے

محبت ایسا دروازہ ہے خاورؔ

ہر اک دستک پہ جو کھلتا نہیں ہے

اظہار کی یہ بھی صورت تھی

خاموشی کو فریاد کیا

آئنے پر کوئی تہمت نہ دھرو

خال و خد اپنے سنوارو صاحب

تم نے بہتا دریا دیکھا اور میں نے

پانی پر اک عکس ٹھہرتے دیکھا ہے

بہت وہ ساتھ رہا ہے بہت ہے یاد مجھے

اسے بھلانے کو خاورؔ یہ زندگی کم ہے

اک ترے عشق کے حوالے سے

کام کتنے یہاں نکل آئے

کیسے کیسے موڑ آئے

عمر کی ایک کہانی میں

میری وحشت تو میاں مجھ میں تھی

یہ جو صحرا ہے کہاں تھا پہلے

کھلا تھا لفظ بھی جادو مثال ہوتے ہیں

وہ جب گلاب ہوا تھا گلاب کہنے سے