کھینچ لائی ہے محبت ترے در پر مجھ کو

اتنی آسانی سے ورنہ کسے حاصل ہوا میں

بوڑھی ماں کا شاید لوٹ آیا بچپن

گڑیوں کا انبار لگا کر بیٹھ گئی

مرے خلاف سبھی سازشیں رچیں جس نے

وہ رو رہا ہے مری داستاں سناتا ہوا

کل تیری تصویر مکمل کی میں نے

فوراً اس پر تتلی آ کر بیٹھ گئی

مدتوں آنکھیں وضو کرتی رہیں اشکوں سے

تب کہیں جا کے تری دید کے قابل ہوا میں

رشتہ بحال کاش پھر اس کی گلی سے ہو

جی چاہتا ہے عشق دوبارہ اسی سے ہو

ہمیں تم سے ہمیشہ ملنے آیں کیوں

تمہارے پاؤں میں مہندی لگی ہے کیا

کر گیا خموش مجھ کو دیر تک

چیخنا وہ ایک بے زبان کا

اب اپنے آپ کو خود ڈھونڈھتا ہوں

تمہاری کھوج میں نکلا ہوا میں

زمانے پر تو کھل کر ہنس رہا تھا

ترے چھوتے ہی رو بیٹھا ہے پاگل

کام سب ہو گئے مرے آساں

کون سمجھے گا میری مشکل کو

بہہ گئے آنسوؤں کے دریا میں

آپ کی بات یاد ہی نہ رہی

خواب کیا اس کا بنا میں روح تک تر ہو گیا

ایک قطرہ اس قدر پھیلا سمندر ہو گیا

کیا کسی کا لمس پھر انساں بنائے گا مجھے

اس کے جاتے ہی سموچہ جسم پتھر ہو گیا

میں چراغ سے جلا چراغ ہوں

روشنی ہے پیشہ خاندان کا

سارے خوابوں کے انتقال کے بعد

آپ اور وہ بھی اتنے سال کے بعد

غم کو حیرت زدہ کیا ہم نے

شام کے وقت مسکرائے ہم

وہاں پر زندگی ہی زندگی تھی

اسی کوچے میں مرنا چاہیے تھا

اک اداسی تھی رات تھی ہم تھے

اور پھر حاجت خوشی نہ رہی

رات گزرے تو سفر پر نکلیں

مجھ میں سوئے ہیں مسافر میرے

تم نے دیکھا نہیں اداکاروں

ان کا چہرہ مرے سوال کے بعد

چمک آنکھوں میں کیوں کر بڑھ گئی ہے

ادھورا خواب پورا ہو گیا کیا

یوں ہوا پھر کرشمہ ہوا

مٹی خود کوزہ گر ہو گئی

مجھ کو مٹی میں بویا گیا

میری مٹی شجر ہو گئی