khīñch laa.ī hai mohabbat tire dar par mujh ko

itnī āsānī se varna kise hāsil huā maiñ

khinch lai hai mohabbat tere dar par mujh ko

itni aasani se warna kise hasil hua main

būḌhī maañ kā shāyad lauT aayā bachpan

guḌiyoñ kā ambār lagā kar baiTh ga.ī

buDhi man ka shayad lauT aaya bachpan

guDiyon ka ambar laga kar baiTh gai

mire ḳhilāf sabhī sāzisheñ rachīñ jis ne

vo ro rahā hai mirī dāstāñ sunātā huā

mere KHilaf sabhi sazishen rachin jis ne

wo ro raha hai meri dastan sunata hua

kal terī tasvīr mukammal kī maiñ ne

fauran us par titlī aa kar baiTh ga.ī

kal teri taswir mukammal ki main ne

fauran us par titli aa kar baiTh gai

muddatoñ āñkheñ vazū kartī rahīñ ashkoñ se

tab kahīñ jā ke tirī diid ke qābil huā maiñ

muddaton aankhen wazu karti rahin ashkon se

tab kahin ja ke teri did ke qabil hua main

rishta bahāl kaash phir us kī galī se ho

jī chāhtā hai ishq dobāra usī se ho

rishta bahaal kash phir us ki gali se ho

ji chahta hai ishq dobara usi se ho

hamīñ tum se hamesha milne aa.eñ kyuuñ

tumhāre paañv meñ mehñdī lagī hai kyā

hamin tum se hamesha milne aaen kyun

tumhaare panw mein mehndi lagi hai kya

kar gayā ḳhamosh mujh ko der tak

chīḳhnā vo ek be-zabān kā

kar gaya KHamosh mujh ko der tak

chiKHna wo ek be-zaban ka

ab apne-āp ko ḳhud DhūñDhtā huuñ

tumhārī khoj meñ niklā huā maiñ

ab apne-ap ko KHud DhunDhta hun

tumhaari khoj mein nikla hua main

zamāne par to khul kar hañs rahā thā

tire chhūte hī ro baiThā hai pāgal

zamane par to khul kar hans raha tha

tere chhute hi ro baiTha hai pagal

kaam sab ho ga.e mire āsāñ

kaun samjhegā merī mushkil ko

kaam sab ho gae mere aasan

kaun samjhega meri mushkil ko

bah ga.e āñsuoñ ke dariyā meñ

aap kī baat yaad hī na rahī

bah gae aansuon ke dariya mein

aap ki baat yaad hi na rahi

ḳhvāb kyā us kā bunā maiñ ruuh tak tar ho gayā

ek qatra is qadar phailā samundar ho gayā

KHwab kya us ka buna main ruh tak tar ho gaya

ek qatra is qadar phaila samundar ho gaya

kyā kisī kā lams phir insāñ banā.egā mujhe

us ke jaate hī samūcha jism patthar ho gayā

kya kisi ka lams phir insan banaega mujhe

us ke jate hi samucha jism patthar ho gaya

maiñ charāġh se jalā charāġh huuñ

raushnī hai pesha ḳhāndān kā

main charagh se jala charagh hun

raushni hai pesha KHandan ka

saare ḳhvāboñ ke intiqāl ke baa'd

aap aur vo bhī itne saal ke baa'd

sare KHwabon ke intiqal ke ba'd

aap aur wo bhi itne sal ke ba'd

ġham ko hairat-zada kiyā ham ne

shaam ke vaqt muskurā.e ham

gham ko hairat-zada kiya hum ne

sham ke waqt muskurae hum

vahāñ par zindagī hī zindagī thī

usī kūche meñ marnā chāhiye thā

wahan par zindagi hi zindagi thi

usi kuche mein marna chahiye tha

ik udāsī thī raat thī ham the

aur phir hājat-e-ḳhushī na rahī

ek udasi thi raat thi hum the

aur phir hajat-e-KHushi na rahi

raat guzre to safar par nikleñ

mujh meñ so.e haiñ musāfir mere

raat guzre to safar par niklen

mujh mein soe hain musafir mere

tum ne dekhā nahīñ adākāroñ

un kā chehra mire savāl ke baa'd

tum ne dekha nahin adakaron

un ka chehra mere sawal ke ba'd

chamak āñkhoñ meñ kyūñkar baḌh ga.ī hai

adhūrā ḳhvāb puurā ho gayā kyā

chamak aankhon mein kyunkar baDh gai hai

adhura KHwab pura ho gaya kya

yuuñ huā phir karishma huā

miTTī ḳhud kūza-gar ho ga.ī

yun hua phir karishma hua

miTTi KHud kuza-gar ho gai

mujh ko miTTī meñ boyā gayā

merī miTTī shajar ho ga.ī

mujh ko miTTi mein boya gaya

meri miTTi shajar ho gai