اے وطن جب بھی سر دشت کوئی پھول کھلا

دیکھ کر تیرے شہیدوں کی نشانی رویا

آپس کی گفتگو میں بھی کٹنے لگی زباں

اب دوستوں سے ترک ملاقات چاہئے

طاہرؔ خدا کی راہ میں دشواریاں سہی

عشق بتاں میں کون سی آسانیاں رہیں

اٹھی تھی پہلی بار جدھر چشم آرزو

وہ لوگ پھر ملے نہ وہ بستی نظر پڑی

جب بھی دیکھی ہے کسی چہرے پہ اک تازہ بہار

دیکھ کر میں تری تصویر پرانی رویا

اک عمر بھٹکتے ہوئے گزری ہے جنوں میں

اب کون فریب نگہ یار میں آئے

تجھے بھی دیکھ لیا ہم نے او خدائے اجل

کہ تیرا زور چلا بھی تو اہل غم پہ چلا

عرصۂ ظلمت حیات کٹے

ہم نفس مسکرا کہ رات کٹے

ناز ہر بت کے اٹھا پائے نہ جعفرؔ طاہر

چوم کر چھوڑ دیے ہم نے یہ بھاری پتھر