ai vatan jab bhī sar-e-dasht koī phuul khilā

dekh kar tere shahīdoñ kī nishānī royā

ai watan jab bhi sar-e-dasht koi phul khila

dekh kar tere shahidon ki nishani roya

aapas kī guftugū meñ bhī kaTne lagī zabāñ

ab dostoñ se tark-e-mulāqāt chāhiye

aapas ki guftugu mein bhi kaTne lagi zaban

ab doston se tark-e-mulaqat chahiye

'tāhir' ḳhudā kī raah meñ dushvāriyāñ sahī

ishq-e-butāñ meñ kaun sī āsāniyāñ rahīñ

'tahir' KHuda ki rah mein dushwariyan sahi

ishq-e-butan mein kaun si aasaniyan rahin

uTThī thī pahlī baar jidhar chashm-e-ārzū

vo log phir mile na vo bastī nazar paḌī

uTThi thi pahli bar jidhar chashm-e-arzu

wo log phir mile na wo basti nazar paDi

jab bhī dekhī hai kisī chehre pe ik taaza bahār

dekh kar maiñ tirī tasvīr purānī royā

jab bhi dekhi hai kisi chehre pe ek taza bahaar

dekh kar main teri taswir purani roya

tujhe bhī dekh liyā ham ne o ḳhudā-e-ajal

ki terā zor chalā bhī to ahl-e-ġham pe chalā

tujhe bhi dekh liya hum ne o KHuda-e-ajal

ki tera zor chala bhi to ahl-e-gham pe chala

ik umr bhaTakte hue guzrī hai junūñ meñ

ab kaun fareb-e-nigah-e-yār meñ aa.e

ek umr bhaTakte hue guzri hai junun mein

ab kaun fareb-e-nigah-e-yar mein aae

arsa-e-zulmat-e-hayāt kaTe

ham-nafas muskurā ki raat kaTe

arsa-e-zulmat-e-hayat kaTe

ham-nafas muskura ki raat kaTe

naaz har but ke uThā paa.e na 'jāfar-tāhir'

chuum kar chhoḌ diye ham ne ye bhārī patthar

naz har but ke uTha pae na 'jafar-tahir'

chum kar chhoD diye hum ne ye bhaari patthar