رکھتے ہیں محبت کو تغافل میں چھپا کر

پروا ہی تو کرتے ہیں جو پروا نہیں کرتے

وہ تو بس جھوٹی تسلی کو کہا تھا تم سے

ہم تو اپنے بھی نہیں، خاک تمہارے ہوتے

میں بھلا ہاتھ دعاؤں کو اٹھاتا کیسے

اس نے چھوڑی ہی نہیں کوئی ضرورت باقی

یقیں خود اٹھ گیا ہے مجھ سے میرا

مری اتنی طرف داری ہوئی ہے

سارے تو نہیں جان بچانے میں لگے ہیں

کچھ گھاؤ ہمیں زخم لگانے میں لگے ہیں

عکس خیال یار سنوارا کریں گے ہم

شیشے میں آئنے کو اتارا کریں گے ہم

راہ طلب میں دام و درم چھوڑ جائیں گے

لکھ لو ہمارے شعر بڑے کام آئیں گے

تم کو سوتے میں بھی کب آنکھ اٹھا کر دیکھا

ہم نے خوابوں میں بھی آنکھوں کی نگہ داری کی