اس سے باتیں تو بہت کرنی تھیں پر سوچ لیا

اس کی ہر بات پہ کہنا ہے کوئی بات نہیں

میں سامنے ہوں ابھی گفتگو کرو مجھ سے

کہ بعد میں مری تصویر دیکھتے رہنا

دستور ہی الگ ہے تری بزم ناز کا

الزام دے کے کہہ دیا الزام ہی تو ہے

اسی کے چہرے پہ آنکھیں ہماری رہ جائیں

کسی کو اتنا بھی کیا دیکھنا ضروری ہے

خدا کا شکر ہے اس رابطے پر

اسے منزل مجھے رستہ بنایا

تمام رات میں خود سے سوال کرتی رہی

جسے چھوا ہو حقیقت میں خواب کیسے ہوا

میں اپنی آنکھوں سے دنیا کو جیت لاؤں گی

تو میرے پاؤں کی زنجیر دیکھتے رہنا

سامنے آئے بنا اس سے مخاطب رہنا

ایک جادو ہے جو آتا ہے مجھے صرف مجھے

موج دریا کی جسے چھوتی نہ ہو

اس کنارے سے کنارا کر رہے ہیں

سچ پوچھو تو ہم کو ہماری

آنکھوں نے برباد کیا ہے

ہم نے اشک بہائے کب ہیں

پانی کو آزاد کیا ہے

جس کے چہرے پہ میں مرتی ہوں ستم تو یہ ہے

اس کی تصویر ہی البم میں مرے ساتھ نہیں

کتنے چہرے ہیں مصور کے تصور میں نہاں

پر وہ تصویر بناتا ہے مجھے صرف مجھے

تجھ کو دیکھوں تو یہی سوچتی ہوں میں اکثر

دیکھ حیراں مجھے حیران کوئی اور نہ ہو

ایسا ویسا کوئی نہ سمجھے مجھے

میرؔ غالبؔ کی شاعری ہوں میں

کبھی دریا کبھی صحرا بنایا

کسی کے عشق نے کیا کیا بنایا

میں نے اسرار اذیت میں ہی کھلتے دیکھے

بات چھوٹی ہے مگر سب کو بتا دی جائے

مان لیتی میں کہا اس کا مگر

وہ گزارش کر رہا ہے ضد نہیں

اپنی پلکیں جھکا رہی ہوں میں

کوئی آنسو بچا رہی ہوں میں

سچ پوچھو تو ہم کو ہماری

آنکھوں نے برباد کیا ہے

پہلے اس کو یاد کیا ہے

پھر آنسو ایجاد کیا ہے

یوں ہی تھوڑی وہ مل گیا مجھ کو

مدتوں لاپتا رہی ہوں میں