maiñ sāmne huuñ abhī guftugū karo mujh se

ki baad meñ mirī tasvīr dekhte rahnā

main samne hun abhi guftugu karo mujh se

ki baad mein meri taswir dekhte rahna

apnī palkeñ jhukā rahī huuñ maiñ

koī aañsū bachā rahī huuñ maiñ

apni palken jhuka rahi hun main

koi aansu bacha rahi hun main

us se bāteñ to bahut karnī thiiñ par soch liyā

us kī har baat pe kahnā hai koī baat nahīñ

us se baaten to bahut karni thin par soch liya

us ki har baat pe kahna hai koi baat nahin

sach pūchho to ham ko hamārī

āñkhoñ ne barbād kiyā hai

sach puchho to hum ko hamari

aankhon ne barbaad kiya hai

sach pūchho to ham ko hamārī

āñkhoñ ne barbād kiyā hai

sach puchho to hum ko hamari

aankhon ne barbaad kiya hai

ham ne ashk bahā.e kab haiñ

paanī ko āzād kiyā hai

hum ne ashk bahae kab hain

pani ko aazad kiya hai

ḳhudā kā shukr hai is rābte par

use manzil mujhe rasta banāyā

KHuda ka shukr hai is rabte par

use manzil mujhe rasta banaya

pahle us ko yaad kiyā hai

phir aañsū ījād kiyā hai

pahle us ko yaad kiya hai

phir aansu ijad kiya hai

maan letī maiñ kahā us kā magar

vo guzārish kar rahā hai zid nahīñ

man leti main kaha us ka magar

wo guzarish kar raha hai zid nahin

tamām raat maiñ ḳhud se savāl kartī rahī

jise chhuā ho haqīqat meñ ḳhvāb kaise huā

tamam raat main KHud se sawal karti rahi

jise chhua ho haqiqat mein KHwab kaise hua

maiñ ne asrār aziyyat meñ hī khulte dekhe

baat chhoTī hai magar sab ko batā dī jaa.e

main ne asrar aziyyat mein hi khulte dekhe

baat chhoTi hai magar sab ko bata di jae

aisā vaisā koī na samjhe mujhe

'mīr' 'ġhālib' kī shā.erī huuñ maiñ

aisa waisa koi na samjhe mujhe

'mir' 'ghaalib' ki shaeri hun main

maiñ apnī āñkhoñ se duniyā ko jiit lā.ūñgī

tū mere paañv kī zanjīr dekhte rahnā

main apni aankhon se duniya ko jit laungi

tu mere panw ki zanjir dekhte rahna

tujh ko dekhūñ to yahī sochtī huuñ maiñ aksar

dekh hairāñ mujhe hairān koī aur na ho

tujh ko dekhun to yahi sochti hun main aksar

dekh hairan mujhe hairan koi aur na ho

jis ke chehre pe maiñ martī huuñ sitam to ye hai

us kī tasvīr hī album meñ mire saath nahīñ

jis ke chehre pe main marti hun sitam to ye hai

us ki taswir hi album mein mere sath nahin

mauj dariyā kī jise chhūtī na ho

us kināre se kinārā kar rahe haiñ

mauj dariya ki jise chhuti na ho

us kinare se kinara kar rahe hain

yūñhī thoḌī vo mil gayā mujh ko

muddatoñ lāpatā rahī huuñ maiñ

yunhi thoDi wo mil gaya mujh ko

muddaton lapata rahi hun main

kabhī dariyā kabhī sahrā banāyā

kisī ke ishq ne kyā kyā banāyā

kabhi dariya kabhi sahra banaya

kisi ke ishq ne kya kya banaya

kitne chehre haiñ musavvir ke tasavvur meñ nihāñ

par vo tasvīr banātā hai mujhe sirf mujhe

kitne chehre hain musawwir ke tasawwur mein nihan

par wo taswir banata hai mujhe sirf mujhe

dastūr hī alag hai tirī bazm-e-nāz kā

ilzām de ke kah diyā ilzām hī to hai

dastur hi alag hai teri bazm-e-naz ka

ilzam de ke kah diya ilzam hi to hai

usī ke chehre pe āñkheñ hamārī rah jaa.eñ

kisī ko itnā bhī kyā dekhnā zarūrī hai

usi ke chehre pe aankhen hamari rah jaen

kisi ko itna bhi kya dekhna zaruri hai

sāmne aa.e binā us se muḳhātab rahnā

ek jaadū hai jo aatā hai mujhe sirf mujhe

samne aae bina us se muKHatab rahna

ek jadu hai jo aata hai mujhe sirf mujhe