hamesha aag ke dariyā meñ ishq kyuuñ utre

kabhī to husn ko ġharq-e-azāb honā thā

hamesha aag ke dariya mein ishq kyun utre

kabhi to husn ko gharq-e-azab hona tha

koī zamīn hai to koī āsmān hai

har shaḳhs apnī zaat meñ ik dāstān hai

koi zamin hai to koi aasman hai

har shaKHs apni zat mein ek dastan hai

maiñ lafz lafz meñ tujh ko talāsh kartā huuñ

savāl meñ nahīñ aatā na aa javāb meñ aa

main lafz lafz mein tujh ko talash karta hun

sawal mein nahin aata na aa jawab mein aa

manzil pe bhī pahuñch ke mayassar nahīñ sakūñ

majbūr is qadar haiñ shu.ūr-e-safar se ham

manzil pe bhi pahunch ke mayassar nahin sakun

majbur is qadar hain shuur-e-safar se hum

ġham-e-firāq ko siine se lag ke sone do

shab-e-tavīl kī hogī sahar kabhī na kabhī

gham-e-firaq ko sine se lag ke sone do

shab-e-tawil ki hogi sahar kabhi na kabhi

vo kaun thā jo mirī zindagī ke daftar se

hurūf le gayā ḳhālī kitāb chhoḌ gayā

wo kaun tha jo meri zindagi ke daftar se

huruf le gaya KHali kitab chhoD gaya

sukūn vasl meñ itnā nasīb ho ki na ho

jis iztirāb se maiñ intizār kartā huuñ

sukun wasl mein itna nasib ho ki na ho

jis iztirab se main intizar karta hun

TuuT kar kitnoñ ko majrūh ye kar saktā hai

sañg tū ne abhī dekhā nahīñ shīshe kā jigar

TuT kar kitnon ko majruh ye kar sakta hai

sang tu ne abhi dekha nahin shishe ka jigar

vo merī fahm kā letā hai imtihāñ shāyad

ki har savāl se pahle javāb māñge hai

wo meri fahm ka leta hai imtihan shayad

ki har sawal se pahle jawab mange hai

chubh rahā thā dil meñ har dam kar rahā thā be-qarār

ik aziyyat-nāk pahlū jo mirī rāhat meñ thā

chubh raha tha dil mein har dam kar raha tha be-qarar

ek aziyyat-nak pahlu jo meri rahat mein tha

ġham-e-hastī bhalā kab mo'tabar ho

mohabbat meñ na jab tak aañkh tar ho

gham-e-hasti bhala kab mo'tabar ho

mohabbat mein na jab tak aankh tar ho

patvār gir ga.ī thī samundar kī god meñ

dil kā safīna phir bhī lahū ke safar meñ thā

patwar gir gai thi samundar ki god mein

dil ka safina phir bhi lahu ke safar mein tha

maiñ shuā-e-zāt ke siine meñ gūñjā huuñ kabhī

aur 'karāmat' maiñ kabhī lamhoñ ke ḳhvāboñ meñ rahā

main shua-e-zat ke sine mein gunja hun kabhi

aur 'karamat' main kabhi lamhon ke KHwabon mein raha

tum mirā haal pūchhte kyā ho

ab to jis haal meñ huuñ achchhā hai

tum mera haal puchhte kya ho

ab to jis haal mein hun achchha hai

tum hameñ yaad karo yā na karo

ham tumheñ yaad kiye jaate haiñ

tum hamein yaad karo ya na karo

hum tumhein yaad kiye jate hain

achchhā hai yā ḳharāb nahīñ is se vāsta

phūTā huā ye merā muqaddar mujhe aziiz

achchha hai ya KHarab nahin is se wasta

phuTa hua ye mera muqaddar mujhe aziz

jo aaya hai use jaanā hai ik din

azal se to yahī ik silsila hai

jo aaya hai use jaana hai ek din

azal se to yahi ek silsila hai

kyā zamāne kā e.atibār karūñ

ab nahīñ apnā e.atibār mujhe

kya zamane ka eatibar karun

ab nahin apna eatibar mujhe

tum kaam apnā kal ke liye chhoḌte ho kyoñ

dekhā hai kis ne kal ko jo karnā hai kar lo aaj

tum kaam apna kal ke liye chhoDte ho kyon

dekha hai kis ne kal ko jo karna hai kar lo aaj

ye apne hī kirdār kā hai natīja

jo rab kī taraf se ye ham par ġhazab hai

ye apne hi kirdar ka hai natija

jo rab ki taraf se ye hum par ghazab hai

hāthī ke ka.ī daañt chabāne ke liye haiñ

kuchh daañt magar sirf dikhāne ke liye haiñ

hathi ke kai dant chabane ke liye hain

kuchh dant magar sirf dikhane ke liye hain

haath aa.e karāmat ko kyā ālam-e-fānī se

aaya hai bashar tanhā jā.egā bashar ḳhālī

hath aae karamat ko kya aalam-e-fani se

aaya hai bashar tanha jaega bashar KHali