کوئی زمین ہے تو کوئی آسمان ہے

ہر شخص اپنی ذات میں اک داستان ہے

ہمیشہ آگ کے دریا میں عشق کیوں اترے

کبھی تو حسن کو غرق عذاب ہونا تھا

منزل پہ بھی پہنچ کے میسر نہیں سکوں

مجبور اس قدر ہیں شعور سفر سے ہم

میں لفظ لفظ میں تجھ کو تلاش کرتا ہوں

سوال میں نہیں آتا نہ آ جواب میں آ

غم فراق کو سینے سے لگ کے سونے دو

شب طویل کی ہوگی سحر کبھی نہ کبھی

وہ کون تھا جو مری زندگی کے دفتر سے

حروف لے گیا خالی کتاب چھوڑ گیا

سکون وصل میں اتنا نصیب ہو کہ نہ ہو

جس اضطراب سے میں انتظار کرتا ہوں

ٹوٹ کر کتنوں کو مجروح یہ کر سکتا ہے

سنگ تو نے ابھی دیکھا نہیں شیشے کا جگر

وہ میری فہم کا لیتا ہے امتحاں شاید

کہ ہر سوال سے پہلے جواب مانگے ہے

جو آیا ہے اسے جانا ہے اک دن

ازل سے تو یہی اک سلسلہ ہے

تم ہمیں یاد کرو یا نہ کرو

ہم تمہیں یاد کیے جاتے ہیں

چبھ رہا تھا دل میں ہر دم کر رہا تھا بے قرار

اک اذیت ناک پہلو جو مری راحت میں تھا

غم ہستی بھلا کب معتبر ہو

محبت میں نہ جب تک آنکھ تر ہو

پتوار گر گئی تھی سمندر کی گود میں

دل کا سفینہ پھر بھی لہو کے سفر میں تھا

ہاتھی کے کئی دانت چبانے کے لئے ہیں

کچھ دانت مگر صرف دکھانے کے لئے ہیں

تم مرا حال پوچھتے کیا ہو

اب تو جس حال میں ہوں اچھا ہے

کیا زمانے کا اعتبار کروں

اب نہیں اپنا اعتبار مجھے

میں شعاع ذات کے سینے میں گونجا ہوں کبھی

اور کرامتؔ میں کبھی لمحوں کے خوابوں میں رہا

اچھا ہے یا خراب نہیں اس سے واسطہ

پھوٹا ہوا یہ میرا مقدر مجھے عزیز

تم کام اپنا کل کے لئے چھوڑتے ہو کیوں

دیکھا ہے کس نے کل کو جو کرنا ہے کر لو آج

ہاتھ آئے کرامت کو کیا عالم فانی سے

آیا ہے بشر تنہا جائے گا بشر خالی

یہ اپنے ہی کردار کا ہے نتیجہ

جو رب کی طرف سے یہ ہم پر غضب ہے