چپکے سے سہہ رہا ہوں ستم تیرے بے وفا

میری خطا تو جب ہو کہ چوں کر رہا ہوں میں

محبت زلف کا آسیب جادو ہے نگاہوں کا

محبت فتنۂ محشر بلائے ناگہانی ہے

سچ تو یہ ہے کہ دعا نے نہ دوا نے رکھا

ہم کو زندہ ترے دامن کی ہوا نے رکھا

خارؔ الفت کی بات جانے دو

زندگی کس کو سازگار آئی

میں نے مانا کہ عدو بھی ترا شیدائی ہے

فرق ہوتا ہے فدا ہونے میں مر جانے میں

چشم گریاں کی آبیاری سے

دل کے داغوں پہ پھر بہار آئی

اٹھے نہ بیٹھ کر کبھی کوئے حبیب سے

اس در پے کیا گئے کہ اسی در کے ہو گئے

یہ نگری حسن والوں کی عجب نگری ہے اے ہم دم

کہ اس نگری میں آہوں کی بھی تاثیریں بدلتی ہیں

برہمی حسن کو کچھ اور جلا دیتی ہے

وہ جمالی تیرا چہرہ وہ جلالی آنکھیں