kahāñ hai tāb-o-tāqat jis pe tum ko naaz rahtā thā

javānī par na tum 'masrūr' itrāte to achchhā thā

kahan hai tab-o-taqat jis pe tum ko naz rahta tha

jawani par na tum 'masrur' itraate to achchha tha

ḳhvāb jab se ik hasīna ke nazar aane lage

maulvī sāhab bhī beauty parlour jaane lage

KHwab jab se ek hasina ke nazar aane lage

maulwi sahab bhi beauty parlour jaane lage

muft kī pī kar kahī thī ek din ham ne ġhazal

sher uTh uTh kar chachā ġhālib se Takrāne lage

muft ki pi kar kahi thi ek din hum ne ghazal

sher uTh uTh kar chacha ghaalib se Takrane lage

marhūm shā'iroñ kā jo mil jaa.e kuchh kalām

sarqe kā le ke jaam chalo shā'irī kareñ

marhum sha'iron ka jo mil jae kuchh kalam

sarqe ka le ke jam chalo sha'iri karen

ga.e the bālTī bharne pe un se ishq kar baiThe

ghaḌe apne kisī masjid se bhar laate to achchhā thā

gae the baalTi bharne pe un se ishq kar baiThe

ghaDe apne kisi masjid se bhar late to achchha tha

javānī un ko ghar meñ chain se rahne nahīñ detī

miyāñ 'masrūr' hī mujrim magar Thahrā.e jaate haiñ

jawani un ko ghar mein chain se rahne nahin deti

miyan 'masrur' hi mujrim magar Thahrae jate hain

ek bosa de ke vo bole maza aayā nahīñ

ek bose meñ rumūz-e-ishq khul jā.eñge kyā

ek bosa de ke wo bole maza aaya nahin

ek bose mein rumuz-e-ishq khul jaenge kya

vo na jaage ki zarā jāgtī taqdīr mirī

aur sab jaag uThe khaaT ke sarkāne se

wo na jage ki zara jagti taqdir meri

aur sab jag uThe khaT ke sarkane se

is buḌhāpe meñ lagāyā hai unhoñ ne surmā

baaz aate nahīñ vo ab bhī sitam Dhāne se

is buDhape mein lagaya hai unhon ne surma

baz aate nahin wo ab bhi sitam Dhane se

sasurāl meñ bhī daal kā galnā muhāl hai

saale haiñ be-lagām chalo shā'irī kareñ

sasural mein bhi dal ka galna muhaal hai

sale hain be-lagam chalo sha'iri karen

phir se vo yogā kī varzish kar rahe haiñ baam par

phir se laTh apne mohalle meñ vo chalvā.eñge kyā

phir se wo yoga ki warzish kar rahe hain baam par

phir se laTh apne mohalle mein wo chalwaenge kya

kahā thā doctor ne bach ke rahnā ḳhush-ḳhurākī se

magar tauba vo baiThe haiñ to ab tak khaa.e jaate haiñ

kaha tha doctor ne bach ke rahna KHush-KHuraki se

magar tauba wo baiThe hain to ab tak khae jate hain

ek bose ke liye itnā hameñ dauḌā.eñge

kyā ḳhabar thī vo qutub-mīnār par chaḌh jā.eñge

ek bose ke liye itna hamein dauDaenge

kya KHabar thi wo qutub-minar par chaDh jaenge