gale meñ apne pahnā hai jo tū ne ai but-e-kāfir

mirī tasbīh ko hai rashk zunnār-e-barahman par

gale mein apne pahna hai jo tu ne ai but-e-kafir

meri tasbih ko hai rashk zunnar-e-barahman par

ka.aba kā aur ḳhāna-e-dil kā ye haal hai

jaise koī makāñ ho makāñ ke javāb meñ

kaba ka aur KHana-e-dil ka ye haal hai

jaise koi makan ho makan ke jawab mein

nazar kisī ko vo mū-e-kamar nahīñ aatā

ba-rañg-e-tār-e-nazar hai nazar nahīñ aatā

nazar kisi ko wo mu-e-kamar nahin aata

ba-rang-e-tar-e-nazar hai nazar nahin aata

hasrat-e-dīd meñ āḳhir ko dam apnā ulTā

parda-e-chashm na us shoḳh ne apnā ulTā

hasrat-e-did mein aaKHir ko dam apna ulTa

parda-e-chashm na us shoKH ne apna ulTa

sehhat hai maraz qazā shifā hai

allāh hakīm hai hamārā

sehhat hai maraz qaza shifa hai

allah hakim hai hamara

kyā diyā bosa lab-e-shīrīñ kā ho kar tursh-rū

muñh huā mīThā to kyā dil apnā khaTTā ho gayā

kya diya bosa lab-e-shirin ka ho kar tursh-ru

munh hua miTha to kya dil apna khaTTa ho gaya

toḌ kar ka.abe ko masjid na banāo zāhid

ḳhāna-barbād kisī dil hī meñ kar ghar paidā

toD kar kabe ko masjid na banao zahid

KHana-barbaad kisi dil hi mein kar ghar paida

kyā ġhair kyā aziiz koī nauhagar na ho

ai jaan yuuñ nikal ki badan tak ḳhabar na ho

kya ghair kya aziz koi nauhagar na ho

ai jaan yun nikal ki badan tak KHabar na ho

chashm-e-bātin meñ se jab zāhir kā parda uTh gayā

jo musalmāñ thā vahī hindū nazar aayā mujhe

chashm-e-baatin mein se jab zahir ka parda uTh gaya

jo musalman tha wahi hindu nazar aaya mujhe

ḳhūn-e-ushshāq kā uThā biiḌā

be-sabab kab vo paan khātā hai

KHun-e-ushshaq ka uTha biDa

be-sabab kab wo pan khata hai