محبت اس لیے ظاہر نہیں کی

کہ تم کو اعتبار آئے نہ آئے

نہیں ہے دیر یہاں اپنی جان جانے میں

تمہارے آنے کا بس انتظار باقی ہے

کچھ نہیں معلوم ہوتا دل کی الجھن کا سبب

کس کو دیکھا تھا الٰہی بال سلجھاتے ہوئے

باعث ترک ملاقات بتاو تو سہی

چاہنے والا کوئی ہم سا دکھاؤ تو سہی

میں نے مانا کہ دل نہیں ناکام

پھر مرے کام کیوں نہیں آتا

نہ تسلی نہ تشفی نہ دلاسا نہ وفا

عمر کو کاٹیں ترے چاہنے والے کیوں کر

ہم لب گور ہو گئے ظالم

تو لب بام کیوں نہیں آتا

شب ہجر جب خواب دیکھا یہ دیکھا

کہ تجھ کو گلے سے لگائے ہوئے ہیں

انہیں حال دل کس طرح لکھ کے بھیجیں

نہ ہم ان سے واقف نہ وہ ہم سے واقف

نہ پوچھا اس مسیحا سے کسی نے

ترے بیمار کی بھی کچھ دوا ہے

ہاتھ ٹوٹیں جو چھوا بھی ہو ہاتھ

دکھ گئی ان کی کلائی کیوں کر

جب میں کہتا ہوں کہ نادم ہو کچھ اپنے ظلم پر

سر جھکا کر کہتے ہیں شرم و حیا سے کیا کہیں

خزاں رخصت ہوئی پھر آمد فصل بہاری ہے

گریباں خود بخود ہونے لگا ہے دھجیاں میرا

ہم اپنی روح کو قاصد بنا کے بھیجیں گے

ترا گزر جو وہاں نامہ بر نہیں نہ سہی

ان کے آنے میں کیوں خلل ڈالا

ستیاناس ہو ترا بدلی

ابھی آئے ابھی کہنے لگے لو جاتے ہیں

آگ لینے کو جو آئے تھے تو آنا کیا تھا

یہ ہے آوارہ طبیعت اور وہ نازک مزاج

میں دل وارفتہ نذر یار کر سکتا نہیں

خود بہ خود یک بہ یک چلے آئے

میں تو آنکھیں تلک بچھا نہ سکا

یہ بھی نہ پوچھا تم نے انجمؔ جیتا ہے یا مرتا ہے

واہ جی وا عاشق سے کوئی ایسی غفلت کرتا ہے

خدا کا گھر بھی ہے دل میں بتوں کی چاہ بھی ہے

صنم کدہ بھی ہے دل اپنا خانقاہ بھی ہے

جا لگے گی کشتئ دل ساحل امید پر

دیدۂ تر سے اگر دریا رواں ہو جائے گا

تیری مرضی گر اسی میں ہے کہ ہو دیدار عام

ہم نے آنکھوں پر قدم سارے زمانے کے لیے

کچھ کہانی نہیں مرا قصہ

تم سنو اور کہا کرے کوئی

مثال چرخ رہا آسماں سر گرداں

پر آج تک نہ کھلا یہ کہ جستجو کیا ہے

دکھاتا ہے مرا دل بے الف رے

ہوا ہوں رنج سے میں ز الف رے

ہم بھی اب اپنی محبت سے اٹھاتے ہیں ہاتھ

چاہنے والا اگر ہم کو دکھا اور کوئی

یہ بتلاؤ ہم کو بھی پہچانتے ہو

ہمیں کیا جو ہو سارے عالم سے واقف

شب فرقت ہے ٹھہرتے نہیں شعلے دل میں

تارہ ٹوٹا کہ مری آنکھ سے آنسو ٹوٹا

تھک گئے ہم تو فسوں سازیاں کرتے کرتے

اس پہ چلتا نہیں مطلق کوئی گنڈا تعویذ

تری تیغ کی آب جاتی رہی ہے

مرے زخم پانی چرائے ہوئے ہیں

نقش ہوتی جاتی ہیں لاکھوں بتوں کی صورتیں

کیا یہ دل بھی خطۂ ہندوستاں ہو جائے گا

بتا تو دل کے بچانے کی کوئی راہ بھی ہے

تری نگاہ کی ناوک فگن پناہ بھی ہے

صدا چمن سے جو آتی ہے روز چٹ چٹ کی

بلائیں غنچے تری صبح و شام لیتے ہیں