koī bhī shakl mukammal kitāb ban na sakī

har ek chehra yahāñ iqtibās jaisā hai

koi bhi shakl mukammal kitab ban na saki

har ek chehra yahan iqtibas jaisa hai

sañg-rezo ko haqārat se na Thukrā.iye aap

ḳhaak ke zarre bhī siine meñ sharar rakhte haiñ

sang-rezo ko haqarat se na Thukraiye aap

KHak ke zarre bhi sine mein sharar rakhte hain

jin ajnabī ḳhalāoñ se vāqif nahīñ koī

'muztar' unhīñ ḳhalāoñ kā sayyāra ham hue

jin ajnabi KHalaon se waqif nahin koi

'muztar' unhin KHalaon ka sayyara hum hue

mahfil meñ un kī khul gayā dil kā muāmla

palkoñ pe ashk rah ga.e piine ke ba.ad bhī

mahfil mein un ki khul gaya dil ka muamla

palkon pe ashk rah gae pine ke baad bhi

ḳhulūs ho to kahīñ bandagī kī qaid nahīñ

sanam-kade meñ tavāf-e-haram bhī mumkin hai

KHulus ho to kahin bandagi ki qaid nahin

sanam-kade mein tawaf-e-haram bhi mumkin hai

kal raat mire dil ne phir chupke se pūchhā hai

'muztar' tirī aahoñ meñ aa.egā asar kab tak

kal raat mere dil ne phir chupke se puchha hai

'muztar' teri aahon mein aaega asar kab tak

haa.e be-chehragī ye insāñ kī

haa.e ye ādmī-numā kyā hai

hae be-chehragi ye insan ki

hae ye aadmi-numa kya hai

bahut qarīb hai 'muztar' vo zindagī kā nizām

nazar na aa.egā jab koī bismil o qātil

bahut qarib hai 'muztar' wo zindagi ka nizam

nazar na aaega jab koi bismil o qatil

jhukī jhukī jo hai kaḌvī-kasīlī niim kī shāḳh

usī pe shahd kā chhatta dikhā.ī detā hai

jhuki jhuki jo hai kaDwi-kasili nim ki shaKH

usi pe shahd ka chhatta dikhai deta hai

ik Thes bhī halkī sī patthar se girāñ-tar hai

nāzuk hai ye dil itnā shīshe kā ho ghar jaise

ek Thes bhi halki si patthar se giran-tar hai

nazuk hai ye dil itna shishe ka ho ghar jaise