ba.ad marne ke bhī armān yahī hai ai dost

ruuh merī tire āġhosh-e-mohabbat meñ rahe

baad marne ke bhi arman yahi hai ai dost

ruh meri tere aaghosh-e-mohabbat mein rahe

kisī se phir maiñ kyā ummīd rakkhūñ

mirī ummīd to yārab tū hī hai

kisi se phir main kya ummid rakkhun

meri ummid to yarab tu hi hai

jo bhī de de vo karam se vahī le le 'nādir'

muñh se māñgo to ḳhudā aur ḳhafā hotā hai

jo bhi de de wo karam se wahi le le 'nadir'

munh se mango to KHuda aur KHafa hota hai

jal bujhūñgā bhaḌak ke dam bhar meñ

maiñ huuñ goyā diyā divālī kā

jal bujhunga bhaDak ke dam bhar mein

main hun goya diya diwali ka

phuul khulte hī titlī bhī aa.ī

kyā koī dostī purānī hai

phul khulte hi titli bhi aai

kya koi dosti purani hai

tujhe dekhā tire jalvoñ ko dekhā

ḳhudā ko dekh kar ab kyā karūñgā

tujhe dekha tere jalwon ko dekha

KHuda ko dekh kar ab kya karunga

matlab kā zamāna hai 'nādir' koī kyā degā

mujh soḳhta-e-qismat ko degā to ḳhudā degā

matlab ka zamana hai 'nadir' koi kya dega

mujh soKHta-e-qismat ko dega to KHuda dega

bhare rahte haiñ ashk āñkhoñ meñ har dam

mirī har saañs meñ ab ġham kī bū hai

bhare rahte hain ashk aankhon mein har dam

meri har sans mein ab gham ki bu hai

tū hī vo phuul hai jo hai mahbūb

patte patte kā Daalī Daalī kā

tu hi wo phul hai jo hai mahbub

patte patte ka Dali Dali ka

pattharoñ pe naam likhtā huuñ tirā

dekh tū o but mirī dīvāngī

pattharon pe nam likhta hun tera

dekh tu o but meri diwangi

nañg hai rāz-e-mohabbat kā numāyāñ honā

mar bhī jā.ūñ maiñ agar tum na pareshāñ honā

nang hai raaz-e-mohabbat ka numayan hona

mar bhi jaun main agar tum na pareshan hona

insān ke dil ko hī koī saaz nahīñ hai

kis parde meñ varna tirī āvāz nahīñ hai

insan ke dil ko hi koi saz nahin hai

kis parde mein warna teri aawaz nahin hai

rahmat-e-haq ko na kar māyūs apne fe.al se

vo bhalā.ī meñ nahīñ jo hai burā.ī meñ mazā

rahmat-e-haq ko na kar mayus apne feal se

wo bhalai mein nahin jo hai burai mein maza

ham dil fidā kareñ ki tasadduq-e-jigar kareñ

jo bhī kaheñ huzūr vahī umr bhar kareñ

hum dil fida karen ki tasadduq-e-jigar karen

jo bhi kahen huzur wahi umr bhar karen