تو درد بھی دعا بھی تو زخم بھی دوا بھی

شکوے بھی ہیں تجھی سے اور پیار بھی تجھی سے

شام کی شام سے سرگوشی سنی تھی اک بار

بس تبھی سے تجھے امکان میں رکھا ہوا ہے

کتنی ویرانی ہے میرے اندر

کس قدر تیری کمی ہے مجھ میں

بن ترے وقت ہی گزرتا ہے

بن ترے زندگی نہیں ہوتی

اب تو وہ شہر خموشاں کا مکیں ہو چکا ہے

اپنی آنکھوں سے مرے آنسو بہانے والا

یعنی کہ تو قدیم جزیرہ ہے عشق کا

اور اس میں ہوں حنوط شدہ شاہزادی میں

کوئی تو بات اس کی مان لیتی

محبت عمر میں مجھ سے بڑی تھی

بے سبب خامشی نہیں اوڑھی

تیری آنکھوں کا حکم مانا ہے

وہ ہجرتیں ہوں ہجر ہو یا قصۂ وصال

آ پھر سے میرے نام سبھی واقعات کر

زندگی اس قدر بری بھی نہیں

دیکھ میں مسکرا رہی ہوں نا

جانے کس سمت اڑتا پھرتا ہے

میرا یہ دل ترے خیال میں گم

ریزہ ریزہ ہونا بنتا ہے مرا

تم مکمل میرے دل پر اترے ہو

میں اس کے دھیان میں کھوئی ہوئی تھی

سبھی مصرعے غزل کے سج گئے ہیں

اور پھر دل نے اس کو چھوڑ دیا

جب تعلق بحال تھا ہی نہیں

مان لیتی ہوں مکمل ہو تم

مان لیتی ہوں کمی ہے مجھ میں

کتنی خواہشیں دل میں پلتی ہیں مگر ناہیدؔ

ہاتھ ہی نئیں آتے بھاگتے ہوئے لمحے

شوخ ہواؤں کے آنچل میں تھم تھم کر

شام سے ہی ہیں درد پرانے یاد آئے

مجھے درد کی بارشوں میں بہا کر

وہ رہنا ترا بے خبر یاد آیا

خشک ہونے ہی نہیں دیتی آنکھ

وہ جو ساون کی جھڑی ہے مجھ میں

میری آنکھیں تری دید کی لالچی

یعنی تو مجھ کو یوسف نما صاحبا

سن کسی دن تو مرے غم کی کہانی

تجھ کو درد دل بتانا چاہتی ہوں