فلک پہ چاند ستارے نکلتے ہیں ہر شب

ستم یہی ہے نکلتا نہیں ہمارا چاند

ہم کو بھرم نے بحر توہم بنا دیا

دریا سمجھ کے کود پڑے ہم سراب میں

وہ ماہ جلوہ دکھا کر ہمیں ہوا روپوش

یہ آرزو ہے کہ نکلے کہیں دوبارا چاند

قالب کو اپنے چھوڑ کے مقلوب ہو گئے

کیا اور کوئی قلب ہے اس انقلاب میں

سکہ اپنا نہیں جمتا ہے تمہارے دل پر

نقش اغیار کے کس طور سے جم جاتے ہیں

نہیں کھلتا سبب تبسم کا

آج کیا کوئی بوسہ دیں گے آپ

جان و دل تھا نذر تیری کر چکا

تیرے عاشق کی یہی اوقات ہے

یہ روپوشی نہیں ہے صورت مردم شناسی ہے

ہر اک نا اہل تیرا طالب دیدار بن جاتا

برائی بھلائی کی صورت ہوئی

محبت میں سب کچھ روا ہو گیا

دل بھی اب پہلو تہی کرنے لگا

ہو گیا تم سا تمہاری یاد میں

جذبۂ عشق چاہئے صوفی

جو ہے افسردہ اہل حال نہیں

یہ رسالہ عشق کا ہے ادق ترے غور کرنے کا ہے سبق

کبھی دیکھ اس کو ورق ورق مرا سینہ غم کی کتاب ہے

محو لقا جو ہیں ملکوتی خصال ہیں

بیدار ہو کے بھی نظر آتے ہیں خواب میں

نفس مطلب ہی مرا فوت ہوا جاتا ہے

جان جاناں یہ مناسب نہیں گھبرا دینا

چھو لے صبا جو آ کے مرے گل بدن کے پاؤں

قائم نہ ہوں چمن میں نسیم چمن کے پاؤں

سالک ہے گرچہ سیر مقامات دل فریب

جو رک گئے یہاں وہ مقام خطر میں ہیں

کیا ہے چشم مروت نے آج مائل مہر

میں ان کی بزم سے کل آب دیدہ آیا تھا

نگہ ناز سے اس چست قبا نے دیکھا

شوق بیتاب گل چاک گریباں سمجھا

جم گئے راہ میں ہم نقش قدم کی صورت

نقش پا راہ دکھاتے ہیں کہ وہ آتے ہیں

وسعت مشرب رنداں کا نہیں ہے محرم

زاہد سادہ ہمیں بے سر و ساماں سمجھا

ہوا نہ قرب تعلق کا اختصاص یہاں

یہ روشناس ز راہ بعیدہ آیا تھا

نیرنگ عشق آج تو ہو جائے کچھ مدد

پر فن کو ہم کریں متحیر کسی طرح

میری قسمت کی کجی کا عکس ہے

یہ جو برہم گیسوئے پر خم رہا

اپنے جنوں کدے سے نکلتا ہی اب نہیں

ساقی جو مے فروش سر رہ گزار تھا

یہ زمزمہ طیور خوش آہنگ کا نہیں

ہے نغمہ سنج بلبل رنگیں نوائے قلب

عشاق جو تصور برزخ کے ہو گئے

آتی ہے دم بہ دم یہ انہیں کو صدائے‌ قلب