sab kā alag andāz thā sab rang rakhte the judā

rahnā sabhī ke saath thā so ḳhud ko paanī kar liyā

sab ka alag andaz tha sab rang rakhte the juda

rahna sabhi ke sath tha so KHud ko pani kar liya

ik tarīqa ye bhī thā phal bāñTte vo umr-bhar

bhā.iyoñ ne peḌ kaaTā aur lakḌī baañT lī

ek tariqa ye bhi tha phal banTte wo umr-bhar

bhaiyon ne peD kaTa aur lakDi banT li

ḳhūbsūrat ruuh kā ik pairahan hai jism lekin

jism ke malbe meñ sab ne ruuh apnī dafn kar dī

KHubsurat ruh ka ek pairahan hai jism lekin

jism ke malbe mein sab ne ruh apni dafn kar di

yaad karne kī vo shiddat kho ga.ī jaane kahāñ

ab kisī ko hichkiyāñ bhī der tak aatī nahīñ

yaad karne ki wo shiddat kho gai jaane kahan

ab kisi ko hichkiyan bhi der tak aati nahin

zindagī miTTī kī sūrat chaak par rakkhī huī hai

aur ham bante-bigaḌte apnī qismat dekhte haiñ

zindagi miTTi ki surat chaak par rakkhi hui hai

aur hum bante-bigaDte apni qismat dekhte hain

mile do vaqt kī roTī sukūñ se niiñd aa jaa.e

yahī pahlī zarūrat hai jise ham bhuul jaate haiñ

mile do waqt ki roTi sukun se nind aa jae

yahi pahli zarurat hai jise hum bhul jate hain

maanā ki mujh meñ tah bahut haiñ aur gahrā bhī huuñ maiñ

tum ne bhī to mujh ko kabhī kholā nahīñ tartīb se

mana ki mujh mein tah bahut hain aur gahra bhi hun main

tum ne bhi to mujh ko kabhi khola nahin tartib se

maiñ zarā sā kyā khulā vo ḳhud simaTne lag gayā

jo kahā kartā thā mujh se khul ke kyoñ milte nahīñ

main zara sa kya khula wo KHud simaTne lag gaya

jo kaha karta tha mujh se khul ke kyon milte nahin

maanā ki ham-ḳhayāl nahīñ haiñ to kyā huā

aañsū ḳhushī ke saath hī rahte haiñ aañkh meñ

mana ki ham-KHayal nahin hain to kya hua

aansu KHushi ke sath hi rahte hain aankh mein

sabhī ko chāhiye apne gharoñ meñ raushnī lekin

charāġhoñ ko jalāne kā hunar sab ko nahīñ aatā

sabhi ko chahiye apne gharon mein raushni lekin

charaghon ko jalane ka hunar sab ko nahin aata

binā dekhe kisī se ishq kar ke sochtā huuñ maiñ

nahīñ dekhā hai kuchh to ishq āḳhir dekhtā kyā hai

bina dekhe kisi se ishq kar ke sochta hun main

nahin dekha hai kuchh to ishq aaKHir dekhta kya hai

jo samajhte the hamīñ se raushnī duniyā meñ hai

vaqt ne be-vaqt un ko rakh diyā hai taaq par

jo samajhte the hamin se raushni duniya mein hai

waqt ne be-waqt un ko rakh diya hai taq par

saath chal kar dekh mere aur mujh ko aazmā

kyoñ yaqīñ kartā hai logoñ se sunī har baat par

sath chal kar dekh mere aur mujh ko aazma

kyon yaqin karta hai logon se suni har baat par

shahr ke pakke makānoñ meñ darāreñ aa ga.iiñ

gaañv ke kachche gharoñ kī niiñv pakkī thī bahut

shahr ke pakke makanon mein dararen aa gain

ganw ke kachche gharon ki ninw pakki thi bahut

vo kahānī chhoḌtī hai muddatoñ apnā asar

jis kahānī kā kabhī kirdār martā hī nahīñ

wo kahani chhoDti hai muddaton apna asar

jis kahani ka kabhi kirdar marta hi nahin

bahut dushvār hai jiinā kisī bhī band kamre meñ

agar ho band darvāza to khiḌkī khol kar rakhnā

bahut dushwar hai jina kisi bhi band kamre mein

agar ho band darwaza to khiDki khol kar rakhna

zindagī se tañg aa kar ḳhud-kushī kar lī kisī ne

aur koī ḳhud-kushī kartā rahā hai zindagī-bhar

zindagi se tang aa kar KHud-kushi kar li kisi ne

aur koi KHud-kushi karta raha hai zindagi-bhar

jaane kitnī baar sikkoñ ko ginā karte the ham

note kī gaDDī ne ham se rezgārī chhīn lī

jaane kitni bar sikkon ko gina karte the hum

note ki gaDDi ne hum se rezgari chhin li

ab samajh aaya hameñ ye ruuh kyoñ bechain hai

phir rahe haiñ zehn par ham bojh laade jism kā

ab samajh aaya hamein ye ruh kyon bechain hai

phir rahe hain zehn par hum bojh lade jism ka

Thiik ho sakte haiñ vo jo jism se bīmār haiñ

zehn se bīmār haiñ jo un kā darmāñ kuchh nahīñ

Thik ho sakte hain wo jo jism se bimar hain

zehn se bimar hain jo un ka darman kuchh nahin

vo ishāra kar ke pīchhe haT gayā thā ek din

us ishāre ko samajhne meñ lagā huuñ aaj tak

wo ishaara kar ke pichhe haT gaya tha ek din

us ishaare ko samajhne mein laga hun aaj tak

na jaane zindagī kyā dekh kar rishta nibhātī hai

kisī ko de diyā sab kuchh kisī ko kuchh nahīñ miltā

na jaane zindagi kya dekh kar rishta nibhati hai

kisi ko de diya sab kuchh kisi ko kuchh nahin milta

baat karnā pyaar kī āsān se āsān hai

ishq karnā karte rahnā hai kaThin se bhī kaThin

baat karna pyar ki aasan se aasan hai

ishq karna karte rahna hai kaThin se bhi kaThin

baḌh rahā hai zindagī kā canvas har din magar

rang gahrā ab nahīñ dikhtā kisī tasvīr meñ

baDh raha hai zindagi ka canwas har din magar

rang gahra ab nahin dikhta kisi taswir mein

derī se milne kā jo ġham tujh ko pareshāñ kar rahā

ai dost ham bhī haiñ usī tāḳhīr ke maare hue

deri se milne ka jo gham tujh ko pareshan kar raha

ai dost hum bhi hain usi taKHir ke mare hue

dhuup jaaḌā dard duniyā bhuuk patthar pyaas aañsū

jaane kis kis se milā huuñ zindagī tere liye

dhup jaDa dard duniya bhuk patthar pyas aansu

jaane kis kis se mila hun zindagi tere liye

zindagī jab saañs tere paas hī girvī rakhī hai

kyoñ nahīñ detī hameñ tū zindagī jiine kī mohlat

zindagi jab sans tere pas hi girwi rakhi hai

kyon nahin deti hamein tu zindagi jine ki mohlat

ik tire kahne se merā kam nahīñ kirdār hogā

ye alag hai baat maiñ terī kahānī meñ nahīñ huuñ

ek tere kahne se mera kam nahin kirdar hoga

ye alag hai baat main teri kahani mein nahin hun

kisī kā june kabhī ḳhatm hī nahīñ hotā

kisī ke paas december qiyām kartā hai

kisi ka june kabhi KHatm hi nahin hota

kisi ke pas december qiyam karta hai

ajab ye baat hai har dam hamārā sach parakhtā hai

kabhī to jhuuT us kā bhī kasauTī par kasā jaa.e

ajab ye baat hai har dam hamara sach parakhta hai

kabhi to jhuT us ka bhi kasauTi par kasa jae

hai koī shāmil hamārī zindagī ke faisloñ meñ

bach ke jaanā thā jahāñ se ham vahīñ Takrā ga.e haiñ

hai koi shamil hamari zindagi ke faislon mein

bach ke jaana tha jahan se hum wahin Takra gae hain

aag se rishta hai merā aur dariyā bhī hai apnā

aa.e din donoñ ke jhagḌe meñ ulajh kar rah gayā huuñ

aag se rishta hai mera aur dariya bhi hai apna

aae din donon ke jhagDe mein ulajh kar rah gaya hun

mohabbat kā natīja hai jo ab tak saath haiñ donoñ

agar kuchh aur hotā to judā ham ho ga.e hote

mohabbat ka natija hai jo ab tak sath hain donon

agar kuchh aur hota to juda hum ho gae hote

ḳhaak se paidā huā hai ḳhaak meñ mil jā.egā

ek kulhaḌ kī tarah hai aadmī kī zindagī

KHak se paida hua hai KHak mein mil jaega

ek kulhaD ki tarah hai aadmi ki zindagi

kahīñ koī diyā jaltā hai to us ke ishāre par

havā bhī us kī marzī se chalā kartī hai duniyā meñ

kahin koi diya jalta hai to us ke ishaare par

hawa bhi us ki marzi se chala karti hai duniya mein

daulat milī to zindagī meñ aa ga.ī lazzat magar

āñkhoñ se nīñdeñ uḌ ga.iiñ dil kā sukūñ bhī chhin gayā

daulat mili to zindagi mein aa gai lazzat magar

aankhon se ninden uD gain dil ka sukun bhi chhin gaya

saath bhī chhūTā nahīñ koī gila-shikva nahīñ

maiñ nikal kar aa gayā us kī galī se is tarah

sath bhi chhuTa nahin koi gila-shikwa nahin

main nikal kar aa gaya us ki gali se is tarah

jaane kitne hī shanāvar ishq ke dariyā meñ Duube

kaise bachtā maiñ bhī us dariyā se jo pyāsā bahut hai

jaane kitne hi shanawar ishq ke dariya mein Dube

kaise bachta main bhi us dariya se jo pyasa bahut hai

charāġhoñ ko jalānā hai jalāo tum magar pahle

havā ke dil meñ kyā hai ye pata karnā zarūrī hai

charaghon ko jalana hai jalao tum magar pahle

hawa ke dil mein kya hai ye pata karna zaruri hai

ḳhvāb puure ho ga.e to lutf ghaTne lag gayā

zindagī se kuchh shikāyat dil meñ rahnī chāhiye

KHwab pure ho gae to lutf ghaTne lag gaya

zindagi se kuchh shikayat dil mein rahni chahiye

achchhe-bhale jo log ḳhadd-o-ḳhāl se lage

lekin vo chāl-Dhāl se kam-zarf the bahut

achchhe-bhale jo log KHadd-o-KHal se lage

lekin wo chaal-Dhaal se kam-zarf the bahut

lāzim hai intizār karūñgā maiñ umr-bhar

mumkin agar ho tum bhī mirī raah dekhnā

lazim hai intizar karunga main umr-bhar

mumkin agar ho tum bhi meri rah dekhna

pahle to bolte haiñ bharosa hai aap par

phir ye bhī chāhte haiñ vafā kā hisāb duuñ

pahle to bolte hain bharosa hai aap par

phir ye bhi chahte hain wafa ka hisab dun

dīvār ke us paar jaane kī tamanna hai to phir

himmat juTā kar tum kabhī dīvār Dhāte kyoñ nahīñ

diwar ke us par jaane ki tamanna hai to phir

himmat juTa kar tum kabhi diwar Dhate kyon nahin

itnā kahā gayā thā ki zevar utaar deñ

aur aap ne zamīn pe īmān rakh diyā

itna kaha gaya tha ki zewar utar den

aur aap ne zamin pe iman rakh diya

har baat maan lene meñ nuqsān ye bhī hai

ummīd us ko had se ziyāda ho jā.egī

har baat man lene mein nuqsan ye bhi hai

ummid us ko had se ziyaada ho jaegi

ik raushnī ajab sī dikhī us kitāb meñ

jis meñ likhā thā ishq ibādat se kam nahīñ

ek raushni ajab si dikhi us kitab mein

jis mein likha tha ishq ibaadat se kam nahin

chāñd taare toḌ laanā ye bhī koī kaam hai

har qadam par saath mere umr-bhar chal ke dikhā

chand tare toD lana ye bhi koi kaam hai

har qadam par sath mere umr-bhar chal ke dikha

mere kisī savāl kā detā nahīñ javāb

kahtā hai har savāl pe kaisā savāl hai

mere kisi sawal ka deta nahin jawab

kahta hai har sawal pe kaisa sawal hai

iltijā karte hue pyāsā parinda mar gayā

ab to dariyā ko hayā se Duub marnā chāhiye

iltija karte hue pyasa parinda mar gaya

ab to dariya ko haya se Dub marna chahiye