aatā rahā huuñ yaad maiñ us ko tamām umr

is zāviye se ishq meñ nākām kab huā

aata raha hun yaad main us ko tamam umr

is zawiye se ishq mein nakaam kab hua

ḳhat ho koī kitāb ho yā dil kā zaḳhm ho

jo bhī hai mere paas nishānī usī kī hai

KHat ho koi kitab ho ya dil ka zaKHm ho

jo bhi hai mere pas nishani usi ki hai

koī shikva nahīñ ham ko kisī se

ḳhud apnī zaat ham ko chhal rahī hai

koi shikwa nahin hum ko kisi se

KHud apni zat hum ko chhal rahi hai

maiñ tujh se jhuk ke milā huuñ magar ye dhyān rahe

baḌā nahīñ huuñ magar tujh se qad meñ kam bhī nahīñ

main tujh se jhuk ke mila hun magar ye dhyan rahe

baDa nahin hun magar tujh se qad mein kam bhi nahin

ye kaise marhale meñ phañs gayā hai merā ghar mālik

agar chhat ko bachā bhī luuñ to phir dīvār jaatī hai

ye kaise marhale mein phans gaya hai mera ghar malik

agar chhat ko bacha bhi lun to phir diwar jati hai