کچھ ایسا ہو کہ تصویروں میں جل جائے تصور بھی

محبت یاد آئے گی تو شکوے یاد آئیں گے

فکر و احساس کے تپتے ہوئے منظر تک آ

میرے لفظوں میں اتر کر مرے اندر تک آ

آج دیوانے کا ذوق دید پورا ہو گیا

تجھ کو دیکھا اور اس کے بعد اندھا ہو گیا

بادشاہت کے مزے ہیں خاکساری میں سلیمؔ

یہ نظارہ یار کے کوچے میں رہ کے دیکھنا

نور کی شاخ سے ٹوٹا ہوا پتا ہوں میں

وقت کی دھوپ میں معدوم ہوا جاتا ہوں

غالبؔ دانا سے پوچھو عشق میں پڑ کر سلیم

ایک معقول آدمی کیسے نکما ہو گیا

وقت کے صحرا میں ننگے پاؤں ٹھہرے ہو سلیمؔ

دھوپ کی شدت یکایک بڑھ نہ جائے چل پڑو