bujhtī huī sī ek shabīh zehn meñ liye

miTtī huī sitāroñ kī saf dekhte rahe

bujhti hui si ek shabih zehn mein liye

miTti hui sitaron ki saf dekhte rahe

ḳhauf se ab yuuñ na apne ghar kā darvāza lagā

tez haiñ kitnī havā.eñ is kā andāza lagā

KHauf se ab yun na apne ghar ka darwaza laga

tez hain kitni hawaen is ka andaza laga

rone se aur lutf vafāoñ kā baḌh gayā

sab zā.iqa phaloñ meñ na.e pāniyoñ kā hai

rone se aur lutf wafaon ka baDh gaya

sab zaiqa phalon mein nae paniyon ka hai

tujh ko dekhā nahīñ mahsūs kiyā hai maiñ ne

aa kisī din mire ehsās ko paikar kar de

tujh ko dekha nahin mahsus kiya hai main ne

aa kisi din mere ehsas ko paikar kar de

vahī saffāk havāoñ kā sadaf bante haiñ

jin daraḳhtoñ kā nikaltā huā qad hotā hai

wahi saffak hawaon ka sadaf bante hain

jin daraKHton ka nikalta hua qad hota hai

jīvan jiinā kaThin hai vish piinā āsān

insāñ ban kar dekh lo o 'shañkar' bhagvān

jiwan jina kaThin hai wish pina aasan

insan ban kar dekh lo o 'shankar' bhagwan

kāġhaz par likh dījiye apne saare bhed

dil meñ rahe to aañch se ho jā.eñge chhed

kaghaz par likh dijiye apne sare bhed

dil mein rahe to aanch se ho jaenge chhed

shab guzrī bujhne lagā raushniyoñ kā shahr

lauTī sāhil kī taraf thakī thakī ik lahr

shab guzri bujhne laga raushniyon ka shahr

lauTi sahil ki taraf thaki thaki ek lahr

'shāhid' likhnā hai mujhe ye kis kī tārīf

Darā Darā sā qāfiya sahmī huī radīf

'shahid' likhna hai mujhe ye kis ki tarif

Dara Dara sa qafiya sahmi hui radif

zehn meñ tū āñkhoñ meñ tū dil meñ tirā vajūd

merā to bas naam hai har jā tū maujūd

zehn mein tu aankhon mein tu dil mein tera wajud

mera to bas nam hai har ja tu maujud