کتابوں سے نکل کر تتلیاں غزلیں سناتی ہیں

ٹفن رکھتی ہے میری ماں تو بستہ مسکراتا ہے

ہمیں رنجش نہیں دریا سے کوئی

سلامت گر رہے صحرا ہمارا

ترے احساس میں ڈوبا ہوا میں

کبھی صحرا کبھی دریا ہوا میں

دشت جیسی اجاڑ ہیں آنکھیں

ان دریچوں سے خواب کیا جھانکیں

شاید اگلی اک کوشش تقدیر بدل دے

زہر تو جب جی چاہے کھایا جا سکتا ہے

کئی دن بعد اس نے گفتگو کی

کئی دن بعد پھر اچھا ہوا میں

وہ ایک شخص جو دکھنے میں ٹھیک ٹھاک سا تھا

بچھڑ رہا تھا تو لگنے لگا حسین بہت

چاند بیٹھا ہوا ہے پہلو میں

قطرہ قطرہ پگھل رہا ہوں میں

آج میری اک غزل نے اس کے ہونٹوں کو چھوا

آج پہلی بار اپنی شاعری اچھی لگی

میں منتظر ہوں کسی ایسے وصل کا جس میں

مرے بدن پہ ترے جسم کا لباس رہے

وہ کبھی آغاز کر سکتے نہیں

خوف لگتا ہے جنہیں انجام سے

جیسے دیکھا ہو آخری سپنا

رات اتنی اداس تھیں آنکھیں

میں اچھا ہوں تبھی اپنا رہی ہو

کوئی مجھ سے بھی اچھا مل گیا تو

تم اس کو بلندی سے گرانے میں لگے ہو

تم اس کو نگاہوں سے گرا کیوں نہیں دیتے

جب سے حاصل ہوا ہے وہ مجھ کو

خواب آنے لگے بچھڑنے کے

بچھڑ جائیں گے ہم دونوں زمیں پر

یہ اس نے آسماں پر لکھ دیا ہے

میں تیرے ذکر کی وادی میں سیر کرتا رہوں

ہمیشہ لب پہ ترے نام کی مٹھاس رہے

کھلی آنکھوں سے بھی سویا ہوں اکثر

تمہارا راستہ تکتا ہوا میں

تو جا رہا تھا بچھڑ کے تو ہر قدم پہ ترے

پھسل رہی تھی مرے پاؤں سے زمین بہت

میں کہکشاؤں میں خوشیاں تلاشنے نکلا

مرے ستارہ میرا چاند سب اداس رہے

تعلق توڑ کر اس کی گلی سے

کبھی میں جڑ نہ پایا زندگی سے

دل کی دیوار پر سوا اس کے

رنگ دوجا کوئی چڑھا ہی نہیں

اس کے دل کی آگ ٹھنڈی پڑ گئی

مجھ کو شہرت مل گئی الزام سے

کھلی جو آنکھ تو محشر کا شور برپا تھا

میں خوش ہوا کہ چلو آج مر گئی دنیا

خوف آتا ہے اپنے سائے سے

ہجر کے کس مقام پر ہوں میں

اس کی یادوں کی کائی پر اب تو

زندگی بھر مجھے پھسلنا ہے

لکھا ہے تاریخ کے صفحہ صفحہ پر یہ

شاہوں کو بھی داس بنایا جا سکتا ہے

میں سنگ میل تھا تو یہ کرنا پڑا مجھے

تا عمر راستے میں ٹھہرنا پڑا مجھے

خیال کب سے چھپا کے یہ من میں رکھا ہے

مرا قرار تمہارے بدن میں رکھا ہے

زمیں میرے سجدے سے تھرا گئی

مجھے آسماں سے پکارا گیا

تری حیات سے جڑ جاؤں واقعہ بن کر

تری کتاب میں میرا بھی اقتباس رہے

مالک مجھے جہاں میں اتارا ہے کس لئے

آدم کی بھول میرا خسارہ ہے کس لئے

وصل میں سوکھ گئی ہے مری سوچوں کی زمیں

ہجر آئے تو مری سوچ کو شاداب کرے

ہاتھ چھوٹا تو تیرگی میں تھا

ساتھ چھوٹا تو بجھ گئیں آنکھیں