آنکھیں کھلیں تو جاگ اٹھیں حسرتیں تمام

اس کو بھی کھو دیا جسے پایا تھا خواب میں

ہاں تم کو بھول جانے کی کوشش کریں گے ہم

تم سے بھی ہو سکے تو نہ آنا خیال میں

کہاں ہیں آج وہ شمع وطن کے پروانے

بنے ہیں آج حقیقت انہیں کے افسانے

آپ کے پاؤں کے نیچے دل ہے

اک ذرا آپ کو زحمت ہوگی

یہ آدھی رات یہ کافر اندھیرا

نہ سوتا ہوں نہ جاگا جا رہا ہے

کچھ اور مانگنا میرے مشرب میں کفر ہے

لا اپنا ہاتھ دے مرے دست سوال میں

اس سوچ میں بیٹھے ہیں جھکائے ہوئے سر ہم

اٹھے تری محفل سے تو جائیں گے کدھر ہم

عشق کا بندہ بھی ہوں کافر بھی ہوں مومن بھی ہوں

آپ کا دل جو گواہی دے وہی کہہ لیجئے

نماز عشق پڑھی تو مگر یہ ہوش کسے

کہاں کہاں کئے سجدے کہاں قیام کیا

آگ اور دھواں اور ہوس اور ہے عشق اور

ہر حوصلۂ دل کو محبت نہیں کہتے

قفس سے دور سہی موسم بہار تو ہے

اسیرو آؤ ذرا ذکر آشیاں ہو جائے

سجدۂ عشق پہ تنقید نہ کر اے واعظ

دیکھ ماتھے پہ ابھی چاند نمایاں ہوگا

کم ظرف کی نیت کیا پگھلا ہوا لوہا ہے

بھر بھر کے چھلکتے ہیں اکثر یہی پیمانے

اک کافر مطلق ہے ظلمت کی جوانی بھی

بے رحم اندھیرا ہے شمعیں ہیں نہ پروانے

آنکھوں پر اپنی رکھ کر ساحل کی آستیں کو

ہم دل کے ڈوبنے پر آنسو بہا رہے ہیں

اس دل میں تو خزاں کی ہوا تک نہیں لگی

اس پھول کو تباہ کیا ہے بہار نے

دم گھٹا جاتا ہے محبت کا

بند ہی بند گفتگو ہے ابھی

تجھے پا کے تجھ سے جدا ہو گئے ہم

کہاں کھو دیا تو نے کیا ہو گئے ہم

دیا ہے درد تو رنگ قبول دے ایسا

جو اشک آنکھ سے ٹپکے وہ داستاں ہو جائے

ضرب‌ المثل ہیں اب مری مشکل پسندیاں

سلجھا کے ہر گرہ کو پھر الجھا رہا ہوں میں

ٹکراؤں کیوں زمانے سے کیا فائدہ سراجؔ

خود اپنے راستے سے ہٹا جا رہا ہوں میں

ہر نفس اتنی ہی لو دے گا سراجؔ

جتنی جس دل میں حرارت ہوگی

خدا وندا یہ کیسی صبح غم ہے

اجالے میں برستی ہے سیاہی

نہ محتسب کی خوشامد نہ میکدے کا طواف

خودی میں مست ہوں اپنی بہار میں گم ہوں

وہ بھیڑ ہے کہ ڈھونڈھنا تیرا تو درکنار

خود کھویا جا رہا ہوں ہجوم خیال میں

آہ یہ آنسو پیارے پیارے

لکھ دے حساب غم میں ہمارے

رات بھر شمع جلاتا ہوں بجھاتا ہوں سراجؔ

بیٹھے بیٹھے یہی شغل شب تنہائی ہے

ذرا دیکھو یہ سرکش ذرۂ خاک

فلک کا چاند بنتا جا رہا ہے

خوشا وہ دور کہ جب مرکز نگاہ تھے ہم

پڑا جو وقت تو اب کوئی روشناس نہیں

قفس بھی بگڑی ہوئی شکل ہے نشیمن کی

یہ گھر جو پھر سے سنور جائے آشیاں ہو جائے

سوتا رہا ہونٹوں پہ تبسم کا سویرا

رہ رہ کے جگاتے رہے تقدیر سحر ہم

بڑوں بڑوں کے قدم ڈگمگائے جاتے ہیں

پڑا ہے کام بدلتے ہوئے زمانے سے

غسل توبہ کے لیے بھی نہیں ملتی ہے شراب

اب ہمیں پیاس لگی ہے تو کوئی جام نہیں

ہر اشک سرخ ہے دامان شب میں آگ کا پھول

بغیر شمع کے بھی جل رہے ہیں پروانے

ہو گیا آئنہ حال بھی گرد آلودہ

گود میں لاشئہ ماضی کو لیے بیٹھا ہوں

نہ پی سکو تو ادھر آؤ پونچھ دوں آنسو

یہ تم نے سن لئے اس دل کے سانحات کہاں

جو اشک سرخ ہے نامہ نگار ہے دل کا

سکوت شب میں لکھے جا رہے ہیں افسانے

ابھی رکھا رہنے دو طاق پر یوں ہی آفتاب کا آئنہ

کہ ابھی تو میری نگاہ میں وہی میرا ماہ تمام ہے

جان سی شے کی مجھے عشق میں کچھ قدر نہیں

زندگی جیسے کہیں میں نے پڑی پائی ہے

چراغ سجدہ جلا کے دیکھو ہے بت کدہ دفن زیر کعبہ

حدود اسلام ہی کے اندر یہ سرحد کافری ملے گی

کیسے پھاندے گا باغ کی دیوار

تو گرفتار رنگ و بو ہے ابھی

حیران ہیں اب جائیں کہاں ڈھونڈنے تم کو

آئینۂ ادراک میں بھی تم نہیں رہتے

لہو میں ڈوبی ہے تاریخ خلقت انساں

ابھی یہ نسل ہے شائستۂ حیات کہاں

خبر رہائی کی مل چکی ہے چراغ پھولوں کے جل رہے ہیں

مگر بڑی تیز روشنی ہے قفس کا در سوجھتا نہیں ہے

یہ جزر و مد ہے پاداش عمل اک دن یقینی ہے

نہ سمجھو خون انساں بہہ گیا ہے رائیگاں ہو کر

آنسو ہیں کفن پوش ستارے ہیں کفن رنگ

لو چاک کئے دیتے ہیں دامان سحر ہم

چمک شاید ابھی گیتی کے ذروں کی نہیں دیکھی

ستارے مسکراتے کیوں ہیں زیب آسماں ہو کر

دام بر دوش پھریں چاہے وہ گیسو بر دوش

صید بن بن کے ہمیں نے انہیں صیاد کیا

چند تنکوں کی سلیقے سے اگر ترتیب ہو

بجلیوں کو بھی طواف آشیاں کرنا پڑے

پھر بھی پیشانیٔ طوفاں پہ شکن باقی ہے

ڈوبتے وقت بھی دیکھا نہ کنارہ ہم نے